காதலாகி...... கசிந்துருகும் வேளையிலே!

          ஒரு வருடம் முன்பு இங்கிருந்து இந்தியா சென்று வந்த உறவினரிடம் இருந்து துணியில் வரையப்பட்ட பெயிண்டிங்ஸ் இரண்டு எனக்கு பரிசாக கிடைத்தது. அதில் வரையப்பட்டு இருந்ததை பார்த்ததும் எனக்கு அப்படியே அதை வரையவேண்டுமென தோன்றியது. ஒரே அளவில்(30x30cm)  இரண்டு கேன்வஸ் போர்டுக‌ள் வாங்கிவந்து நான்கு வாரங்களில் இரண்டு படங்களையும் வரைந்து முடித்தேன்.

சமீபகாலமாக ஓவிய கண்காட்சிகள் எதிலும் பங்குபெற‌ விருப்பமில்லாமல் போனதால் வரைந்த இவ்விருப்படங்களையும் என் வீட்டின் சுவற்றை அலங்கரிக்க வைத்துக்கொண்டேன்.

பொதுவாக நான் ஆசையாய் வரையும் படங்களை காசாக்கி பார்ப்பதில் விருப்பம் இல்லை என்ற போதிலும், தானாகவே சில சமயம் அப்படி அமைந்துவிடுகிறது. இந்த படங்களை விற்றதும் அப்படிதான்... ஒரு வருடமாக சரியான தொடர்பு இல்லாமல் போன தோழி ஒருத்தி சென்ற மாதம் வீடு தேடி வந்தாள். வந்தவள் சுவற்றில் மாட்டப்பட்டு இருந்த பெயிண்டிங்ஸை பார்த்ததும் பிடித்துப்போய் உடனே வேண்டுமென சொன்னாள். இன்னும் வார்னிஷ் கொடுக்கல, விரைவில் முடித்து த‌ருவதாக‌ சொன்னேன். ‘இதை வரைய எத்தனை மணி நேரங்கள் ஆகி இருக்கும்?’ என கேட்டுக்கொண்டவள், 'சும்மா வாங்கிக்கொள்ள மாட்டேன். அதற்கான பணத்தை கொடுத்தே பெற்றுக்கொள்வேன்’ என்றாள். கடைசியில் அவள் விரும்பியபடியே நடந்தது. நானே தேடி போகாமல் தானாகவே நான் வரைந்த படங்களுக்கு கிடைக்கும் மரியாதையும் சன்மானமும் அதிக சந்தோஷத்தையே கொடுக்கிறது.

சொட்ட சொட்ட கவிதைகளில்தான் காதலை சொல்ல‌ முடியுமா... வண்ணங்களைக்கொண்டு ஓவியங்களிலும் சொல்வதற்கான சிறு முயற்சிதான் இது!