அம்முவாகிய உனக்கு.......

             நீண்ட நாளா உனக்கு ஒரு கடிதமாவது எழுத வேண்டுமென ஆசை எனக்கு. பக்கம் பக்கமாய் பேப்பரில் எழுதியது போய் மெயிலில் இரண்டொரு வரியாக சுருங்கிவிட்ட இன்டர்நெட் யுகத்தில் நாம் இருப்பதால் இதோ அதன் வழியாவே உனக்கு ஒரு கடிதம்.

நல்லா படிக்கிறியா? படிப்பில ஒழுங்கா கவனம் செலுத்து. நல்லா சாப்பிடு, எப்பவும் தூங்கிட்டு இருக்காத. அப்பா அம்மாகிட்ட கோபப்படாத. கூட படிக்கிற ஆண் நண்பர்களிடம் பார்த்து பழகு. நல்ல பொண்ணு என பேர் வாங்குற மாதிரி நடந்துக்கோ...... இப்படி எல்லாம் அட்வைஸ் பண்ணும் வழக்கமான அக்கா நான் இல்லைங்குறது உனக்கே தெரியும். அதனால ஏதோ எனக்கு தோணுவதை எழுதுறன்.

அக்கா தங்கையாக இருந்தும் ஏனோ நமக்குள்ள சின்ன சின்ன சண்டைகள் கூட இதுவரை வந்ததில்ல. இனியும் வரப்போவதில்ல. ஓரே ரசனை ஒரே எண்ணம் என இருப்பது சந்தோஷமாதான் இருக்கு. ஆனா அதுக்காக என்னை மாதிரியே தூங்கும்போது எழுப்பினா இத்தனை கோபம் வருமா உனக்கு? ஆமாமா.... பொறுமையான எனக்கே தூக்கத்தில அத்தனை கோபம் வரும்போது கோவக்காரியான உனக்கு கோப‌ம் வருவது நியாம்தான !!!

எங்கிட்ட இருந்து நீ நிறைய கத்துக்கிட்டதா சொல்லி இருக்க. உனக்கு தெரியுமா நான் கூட உங்கிட்ட இருந்து நிறைய கத்துகிட்டுவரன். முக்கியமா நம்ம ரெண்டு பேருக்குமே பிடிச்ச மெடிகல் சயின்ஸ் பத்தி உன் மூலமா நிறைய தெரிஞ்சுக்கிறேன். இதுல ந‌ம்ம அப்பாக்குதான் ரொம்ப சந்தோஷம். இப்பல்லாம் அவரு அடிக்கடி சொல்லி கொள்வது என்ன தெரியுமா? நான் நிறைவேற்றிடாத அவரின் ஆசையை நீ படித்து நிறைவேற்றிக் கொண்டு இருக்கிறாயாம். நான் என்னடி செய்வேன். எனக்கும் மெடிக்கல் படித்திட ஆசைதான். அதற்காக எத்தனை Entrance Exams எழுதியிருப்பேன். வெளி ஊருல படிக்க வாய்ப்பு கிடைச்சும் உங்கள எல்லாம் விட்டுட்டு எப்படி போறதுன்னு சொன்னேன். இப்ப பாத்தியா ராமன் தேடிய சீதையாய் உன் மாமா என்னை தேடி வர நானும் அவருடன் உங்கள எல்லாம் விட்டு பிரிந்து இவ்வளவு தூரம் வந்துட்டேன். நினைக்குறப்ப‌ வியப்பாதான் இருக்கு. மருத்துவ பணி புனிதம்தான்.ஆனா நான் என்ன செய்ய அதை விட புனிதமான டீச்சர் வேலை எனக்காக காத்துக்கிட்டு இருந்திருக்கு. என்ன, நான் சொல்றது சரிதானே... உன்னைப்போல மருத்துவம் படிப்பவர்களுக்கு கூட கற்றுக்கொடுத்திட ஒரு ஆசிரியர் தேவை இல்லையா!!!

சமீபகாலமா நம்ம அம்மாவின் புலம்பல் இது.... "எனக்கு அம்மாவும் இவதான் மாமியாரும் இவதான்!" பாவமடி நம் அம்மா, கைகுழந்தையாக இருக்கும் போதே த‌ன் தாயை இழந்தவங்க. அதனால சில சமயங்களில் எட்டி பார்க்கும் உன் மாமியார் வேஷத்தை கலைச்சுட்டு அவங்களுக்கு அம்மாவாகவே இருந்து விடு!

சரி உன் பிறந்த நாள் அதுவுமா இதுக்கு மேல உன் பொறுமையை சோதிக்க மாட்டேன். இதுல எழுதி இருக்குற எல்லாம் எனக்கு தெரிந்ததுதானே அப்படிங்குற‌ உன் மைன்ட் வாய்ஸ் எனக்கு கேக்குது. அதனால் சில வரிகளோட முடிச்சிக்கிறேன்.

டீனேஜை விட்டு அடல்ட் உலகத்தில் காலடி எடுத்து வைக்கும் உன்ன அன்புடன் எங்க உலகத்திற்கு வரவேற்று கொள்ளுகிறோம். ஒன்னு மட்டும் சொல்றன் எத்தனை வயதானாலும் மனதளவில் குழந்தையாக இருந்திடு... என்றுமே சந்தோஷமா இருப்பாய்!

உன் கனவை நிஜமாக்கு ! கோல்ட் மெடல் வாங்கிடு ! விரும்பிய படியே மேற்படிப்பில் சைக்காலஜி எடுத்து படி! உன் துறையில் நீ வெற்றி பெற இந்த அக்காவின் வாழ்த்துக்கள்!!! மேலும் உனக்கு என் இனிய பிறந்த நாள் வாழ்த்துக்கள்!!!!!

Happy Birthday Comments

(பி.கு........மேலே உள்ள புகைப்படத்தில் அம்முவின் கால்களை உரசிக்கொண்டிருப்பது கேரளாவின் அதிரம்பள்ளி அருவி!என்னவர் எடுத்த புகைப்படங்களில் எனக்கு மிகவும் பிடித்த படம் இது)