என் மனதில் இருந்து...

காதலே கலை என்பதாலா.....

2012-01-05T23:02:00.000+01:00

சிலை முழுவதும் ப‌ரவி கிடக்கும் காதல்... சுற்றிலும் நிரம்பி வழியும் பார்வையாளர்கள்...க்ளிக் க்ளிக் என தொடர்ந்து எழும் சத்தத்தின் நடுவிலும் ஃப்ளாஷின் வெளிச்சத்திலும் மிக கம்பீரமாய் வீற்றிருக்கிறது - Psyche Revived By Cupid's Kiss எனும் பெயர்க்கொண்ட அச்சிலை! ‌

அற்புதமாக வடிவமைக்கப்பட்டிருக்கும் அந்த சிலையின் உள்ளே ஒளிந்திருக்கும் கதை மிக சுவாரஸியமானது. அழகான கதைக்கு உயிர் கொடுத்து கலையால் கல்லிலும் காதலை பேசவைத்த அற்புதமான ஐரோப்பிய கலைஞர்...Antonio Canova(1757‒1822). சில மாதங்களுக்கு முன்பு லூவர் மியூசியத்திற்கு (பாரிஸ், பிரான்ஸ்) சென்ற போது இந்த‌ சிலையின் அழகில் மனம் ஈர்க்கப்பட்டு புகைப்படம் எடுத்துவந்தேன். அவற்றை பார்க்கும் போதெல்லாம் சுவாரஸியமாக தெரிய... இதையே பென்சிலில் வரைந்து பார்த்தால் என்ன என தோன்ற.. முழுவதுமாக 6 மணி நேரத்திற்கு பின் நான் விரும்பியபடியே வரைந்துமுடித்தேன்!

கலையின் மீதுள்ள காதலா அல்லது காதலே கலை என்பதாலா ..... எது என்னை வரைய தூண்டியது என தெரியவில்லை... ஆனால் நான் மிகவும் ரசித்து அனுபவித்து வரைந்தது இது!!!

உங்கள் ஒவ்வொருவரின் உற்சாகமான ஊக்கங்களால் இதுவரை தொடரும் எனது கலைப்பயணம் இனியும் தொடர ஃபேஸ் புக்கில் என் ஓவியங்களுக்கென Bp-Art-Gallery ஒரு இடத்தை ஏற்படுத்தி உள்ளேன். பதிவுகளுக்கு தொடர்ந்து பின்னூட்டம் அளித்துவரும் உங்கள் அனைவரது ஆதரவும் அங்கேயும் தொடர அன்புடன் வேண்டுகிறேன்.

அனைவருக்கும் இனிய புத்தாண்டு நல்வாழ்த்துக்கள்!

காதல் தேசத்தை தேடி......

2011-11-17T07:20:00.001+01:00

வண்ணக்கலவையில் உருவாகும் ஓவியத்தை விட கருப்பு வெள்ளை ஓவியம்தான் பெரும்பாலானவர்களை கவர்கிறது. எனது பள்ளி நாட்களில் இருந்தே எனக்கும் பென்சில் ஸ்கெட்சில் மிகுந்த ஆர்வம் உண்டு. சமீப நாட்களாக இவற்றை பற்றி நிறைய தெரிந்துக்கொள்வதிலும் கற்றுக்கொள்வதிலும் ஆர்வம் அதிகமாகிக்கொண்டு வருகிறது. இதோ மீண்டும் என் கைவண்ணத்தில் மலர்ந்த அரும்புகள்....

சிறந்த ரசனையோடு ஆழமான பார்வை கொண்டவர்களால் ஓவியங்கள் உயிர்பெறுகிறது என்பது என் எண்ணம். இதோ உங்கள் ரசனையைக்கொண்டு இதற்கு கவிதை படைத்திடுங்கள். உங்களின் கவிதைகளால் உயிர் பெறட்டும் எனது ஓவியம்!

யாருமற்ற தனிமையில்
யாதுமற்ற‌ நிலையினில்
காதல் மட்டுமே துணையாய்
நீ என்னிலும்
நான் உன்னிலும்

சொல்லாத வார்த்தைகளும்
பொல்லாத காதலும்.....

விரல்களின் இறுக்கத்தில் கசிந்திட‌
காதல் தேசத்தை தேடி
நடைபயில்வோம் வா!

மலர்ந்திடும் அரும்புகள்.....!

2011-11-07T13:45:00.000+01:00

ஓவியம் வரைவதற்கான தூண்டுதல் எல்லா மனிதர்களிடமும் சிறுவயதில் இருந்தே உண்டு... அந்த இயற்கையான குணத்திற்குட்பட்டு நாமும் வரைந்து பார்க்க தொடங்கிவிடுவோம். கோடு போட கையில் எது கிடைத்தாலும் அதைக்கொண்டு மனதில் மலரும் கற்பனைக்கேற்றபடி வரைந்து அதை பார்த்து மகிழ்ச்சியடைவோம். இதில் சிறுவர்களுக்கு பெரும் பங்குண்டு. இவர்களுக்கும் ஓவியங்களுக்குமான நெருக்கம் மிக பெரியது. தோன்றும் கற்பனைகளையும் கனவுகளையும் காட்சிகளையும் ஓவியமாக தர இயல்பாக இவர்களால் முடிகிறது. இப்படி சிறப்பு வாய்ந்த சிறுவர்களின் ஓவியங்களை போல சிறுவர்களையே ஓவியமாய் பார்க்கும் எத்தனையோ திறமை மிக்க ஓவியர்களும் உண்டு. குழந்தைகளை ஓவியமாக வரைபவர்களை பார்க்கும் போது பிரமிப்பாக‌ தோன்றும். இணையத்தில் குழந்தைகளின் ஓவியங்களோ அல்லது அவர்களின் புகைப்படங்களோ எதுவாக இருந்தாலும் பார்க்க தவறுவது இல்லை. வரைவதை போல நான் நேசிக்கும் இன்னொன்று புகைப்படம்... ஒரு நொடி உணர்ச்சியையும் படமாக்கி கொடுக்கும் கலை அது. அதிலும் சிறுவர்களை படம்பிடிப்பது என்பது அழகான ஒன்று. இதுவே தூண்டுதலாக அமைய பார்த்த முதல் முறையே மனதில் ஒட்டி கொண்ட.... என்னை மிகவும் கவர்ந்தஒரு புகைப்படத்தை பார்த்து நான் வரைய ஆரம்பித்தேன்.

இம்முறை வழக்கமாக பயன்ப்படுத்தும் HB பென்சிலை தவிர்த்து Graphite pencil 2B-6B உபயோகப்படுத்தினேன். இதனால் எதிர்பார்த்த கருமை நிறம் கிடைத்தது.

வரைய ஆரம்பித்த மூன்று மணி நேரங்களுக்கு பின் கிடைத்ததுதான் கீழே காணும் அரும்புகளின் அணைப்பு.... புகைப்படத்தில் தெரிந்த அன்பின் வெளிப்பாடு நான் வரைந்ததில் தெளிவாக தெரிகிறதா என்பது தெரியவில்லை...! ஆனாலும் நீண்ட இடைவெளிக்கு பிறகு என் ப்ரியமான பதிவுலக நண்பர்களை மீண்டும் சந்தித்ததிலும் வரைந்ததை பகிர்ந்துக்கொண்டதிலும் மகிழ்ச்சியடைகிறேன்.

காதல் மொழி பேசும்.... கற்கள்!

2011-07-28T20:40:00.000+02:00

வரைவதில் குறையாத ஆர்வம்... தொடர்கையில் புது புது முயற்சிகளில் ஈடுபட மனம் முயல்கிறது. கொஞ்ச நாட்களாகவே கல்லில் வரைவது பிடித்திருக்கிற‌து. மிக குறைந்த நேரத்தில் வரைய முடிகிறது. இதற்காக கடற்கரை செல்லும் பொழுதுகளில் கல்லை தேடி தேடி எடுக்கிறேன். நான் மட்டுமல்ல எனக்காக என்னவரும் கண்களை நிலத்தில் தவழ விட்டபடி கற்களை தேடி அலைந்ததை பார்க்கும்போது கொஞ்ச‌ம் சிரிப்பு வந்தாலும் நெஞ்சம் மகிழத்தான் செய்கிறது. அவரின் ஊக்கம் மிக பெரிய பலம் எனக்கு!

வரைய நினைக்கும் காட்சிகளை கண்முன் நிறுத்தி கற்பனை கொண்டு வண்ணம் தீட்ட, குவிந்திருக்கும் கற்களில் எதை எடுத்தாலும் அழகாகவே தெரிந்தது.

அழகாய் தெரிந்த கற்களை இன்னும் அழகாக்க ஏதோ சிறு முயற்சி செய்ததுதான் கீழ்காணும் படங்களில் உள்ளவை. இதற்கான பெயிண்ட் இல்லாத நிலையில் என்னிடம் இருக்கும் ஆயில் பெயிண்டையே உபயோகித்து சென்ற‌ வாரம் வரைந்தேன். நன்றாக காய்ந்தபின் கொஞ்சம் வார்னிஷ் அடித்துவிட... கல் கண்ணாடி போல் ஆனது!

முதலில் ஒரு ஜோடியை நீல நிறத்தின் பின்னனியில் வரைய ஆரம்பித்தேன். பின் அதுவே சுவாரஸியமாக தெரிய அப்படியே தொடர்ந்தேன்... வெவ்வேறு வண்ணங்களில். இதோ.... காதல் மொழி பேச தனித்திருக்கும் இரு உள்ளங்கள்!

தீராத பார்வைகள்...!

2011-07-10T22:00:00.000+02:00

கசங்காத பார்வை

என் உரிமை நீ

என சொல்லாமல்

சொல்லும் பார்வை!

இந்த பெண்ணிற்கென்ற

கனவு உலகில் நுழையும்

அதிகாரம் பெற்று

என் கனவுகளையும்
காட்சிகளாக்கும்!

ஒரு நிமிடப்பார்வை

உயிர்வரை இனிக்கும்

மறு நிமிடப் பார்வையோ

யுக யுகமாய் நீடிக்கும்!

வார்த்தைகளற்ற பொழுதுகளில்

மனதில் வழியும் நேசம்

க‌ண்க‌ளில் மின்ன

புன்னகைத்து பேசிச் செல்லும்!

உன் விழி தீண்ட‌லில்

என் பெண்மை விழித்துக்கொள்ள‌

வெட்கை போர்வைகொண்டு

உன் முகம் பார்க்க
முடியாமல் தவிக்க வைக்கும்!

அணைக்க மறந்து

விரல் கூட தீண்டிடாமலே

பார்வை ஸ்ப‌ரிச‌ங்க‌ளாகி

உள்ளம் தொட்டு

உயிரில் தங்கும்!

தீராத உன் பார்வைகள்

தித்திக்கும்

நித்தம் என்னை அழகாக்கும்!

காணும் நொடிகளில்

எனக்குள் உன்னை தேடி

கண்டெடுக்க முடியாமல்

என்னுயுரிலே கலந்து

உணர்வுகளின் உச்சத்தை

தாங்கி நிற்கும்!

பார்வையின் வேகம்

வ‌தைத்தாலும்

செதுக்குகிறது என்னை!

உன் விழித்தீண்ட‌

யாசிக்கும்

என் கவிதைகளானாலும்

கவிதையான

உன் பார்வைகளே

நான் பெற்ற பாக்கியமடா...!

காதல் பூத்திருக்கும்

உன் பார்வையால்

கவிதை எழுதுகிறது

என் கண்கள்!

அதிசயத்துடன் கூடிய சித்திரமவள்... பெண்!

2011-07-01T21:36:00.000+02:00

அழகு என்பது நிச்சயம் பெண்பால்தான்...என்ற தலைப்பில் நான் வரைந்த ஒரு சில பெண் ஓவியங்களை பகிர்ந்துக்கொண்டதின் தொடர்ச்சியாக இங்கே இன்னும் மூன்று ஓவியங்களை தந்திருக்கிறேன். கருப்பு வெள்ளை படங்களில் எனக்கு எப்பொழுதும் ஆர்வம் அதிகம் எனபதால் வாரப்பத்திரிக்கைகளில் வண்ண ஓவியங்களாக இருந்ததை வெறும் பென்சில் மட்டுமே உபயோகித்து சிறு சிறு மாற்றங்களுடன் எனக்கு பிடித்தமாதிரி வரைந்துக்கொண்டேன்.

நகரத்து நவநாகரிக நங்கையாக......

ஆச்சாரம் சிதறாத பதுமையாக‌.....

அம்சமான செல்வ சீமாட்டியாக......

சிலைகளாகவும் சித்திரங்களாகவும்.... ஒரு கலைக்கூடம்!

2011-06-08T00:12:00.000+02:00

பாரிஸில் உள்ள அருங்காட்சியகங்களில் முக்கியமான ஒன்று லூவர் அருங்காட்சியகம் (Louvre Museum). உலகிலேயே அதிகமான பார்வையாளர்களை கொண்ட வரலாற்று சிற‌ப்புமிக்க இடம் இது. அற்புதமான கலைப்படைப்புகள் கொண்ட இவ்விடம் பாரிஸில் இருப்பது பெருமைகுரியதே! ஐரோப்பிய நாடுகளின் பண்பாடு, கலாச்சாரம், மாவீரன் நெப்போலியன் ஆட்சி பற்றிய குறிப்புகள் கொண்ட இம்மியூசியம் மேலும் பல நாட்டு கலைப்பொருட்களுடன் நம்மை பல நூற்றாண்டுகள் முன்னே அழைத்து செல்கிறது. உலகையே தன்னை பற்றி பேச வைத்த மோனலிசா ஓவியம் (ஒரிஜினல்) இங்குதான் உள்ளது. பத்திரிக்கைகளிலும் தொலைக்காட்சியிலும் பார்த்த மோனலிசாவை நேரில் பார்க்க வேண்டும் என்ற‌ பல நாள் ஆசையே என்னை அங்கு அழைத்து சென்றது.

அரசர்களின் அரண்மனையாக இருந்த இவ்விடம் கலைப்பொருட்களை பாதுகாத்து வைக்கும் இடமாகவும் இருந்திருக்கிறது. உள்ளே நுழைகையிலே பிரமாண்டமான கட்டிடங்கள் பிரமிப்பை ஏற்படுத்துகிறது. அரண்மனையின் நடுவிலே இருபது வருடங்கள் முன்னே கட்டப்பட்ட கண்ணாடியிலான‌ பிரமிட் சூரியனின் ஒளி பட்டு வர்ண‌ ஜால‌ம் காட்டுகிறது. இதுவே மியூசியத்தின் உள்ளே செல்லும் நுழைவு வாயிலாக இருக்கிறது.

நுழைவு கட்டணம் பெற்று உள்ளே சென்றவுடன் முதலில் எதை பார்ப்பது என்ற பிரமிப்பு ஏற்பட்டது.

மொத்தம் எட்டு வகையான கலெக்ஷன்ஸ் என ஒவ்வொரு பிரிவும் ஒவ்வொரு ஹாலில் தனித்தனியாக இருந்தது. முதலில் மோனலிசா ஓவியத்தை பார்க்க வேண்டும் என்ற ஆசையில் இத்தாலிய ஓவியங்கள் உள்ள இடத்திற்கு சென்றேன். சிலைகளும் சித்திரங்களும் ஏன் கூடத்தின் மேற் கூரைகளும் கூட கவிதை பேசுகிறது.

மேற்கூரையில் வரையப்பட்டு இருக்கும் வரலாற்று சம்பவங்கள்....

ஒவ்வொன்றையும் ரசித்து பார்க்கவும் அதை புரிந்துக்கொள்ளவும் அதன் பக்கத்திலேயே வைக்கப்பட்டு இருக்கும் வரலாற்று குறிப்புகளை படித்து தெரிந்துக்கொள்ள‌வும் சில மணி நேரங்கள் போதாது. பல நாட்கள் தேவை!

முக்கிய வரலாற்று நிகழ்வுகள் அனைத்தையும் சிற்பங்களாகவும்

சித்திரங்களாகவும் நம் கண்முண்ணே கொண்டு வந்துள்ள கலைஞர்களை நினைக்கும்போது வியப்பாக இருக்கிறது!

இயேசு கிறிஸ்துவின் பாடுகளில் ஆரம்பித்து அவரின் கடைசி இராவிருந்து வரை ஒவ்வொரு நிகழ்வுகளும் பலகோணங்களில் வரையப்பட்டு இருக்கிறது.

இயேசு கிறிஸ்துவின் பாடுகளை விளக்கும் படங்கள்...

The Last Supper படங்கள்...

அதேபோல் எகிப்தின் எழிலரசி கிளியோபாட்ரா மரணத்தை தழுவும் காட்சியும் பலவிதங்களில் வரையப்பட்டு இருக்கிறது. மிக தத்ருபமாக வரையப்பட்ட ஓவியங்களில் என்னை மிகவும் கவர்ந்தது கிளியோபாட்ராவின் இந்த ஓவியம்தான்.

Death of Cleopatra...

வரலாற்று சிற்பங்களை விட என்னை அதிகம் கவர்ந்தது குழந்தை சிலைகள்தான். ரசித்து பார்க்கவைத்தவைகளில் இதற்குதான் முதலிடம்!

அடுத்த ஆவலுடன் நான் தேடிச்சென்ற மோனலிசா... அங்குள்ள மற்ற ஓவியங்களை காட்டிலும் மிக சாதாரணமாகவே இருந்தது. எத்தனையோ அற்புதமான தத்துருபமான ஓவியங்கள் அங்கிருக்க இவை பெற்ற சிறப்பு மட்டும் ரகசியம்தான். சுற்றிலும் கண்ணாடி கதவுகளால் தனி அறையில் பாதுகாத்து வரப்படும் மோனலிசாவின் ஓவியம் மிக சிறிய அளவிலே இருந்தது. ஆனாலும் இந்த ஓவியத்தை சுற்றிலும் கூட்டம் நிரம்பி வழிந்தது. அருகில் நெருங்க முடியாவண்ணம் சுற்றிலும் பாதுகாப்பு கம்பிகட்டப்பட்டு இரு காவலர்களும் அமர்த்தப்பட்டு இருக்கிறார்கள்.

இதை அடுத்து மக்கள் கூடிய இன்னொரு இடம் பண்டைய‌ கிரேக்க கலாச்சாரங்களை வெளிப்படுத்தி கொண்டிருந்த பகுதி. அதிலும் முக்கியமாக குறிப்பிட்ட ஒரு இடத்தில் நிறைய பேர் ஜோடியாக‌ நின்று படம் எடுத்துக்கொண்டு இருந்தார்கள்! ஆர்வத்துடன் எட்டி பார்க்க; White Marble கொண்டு செய்யபட்ட அற்புதமான சிலை இருந்தது. இவற்றின் பெயர் Psyche Revived by Cupid's Kiss! காதல் உணர்வினை அழகாக பிரதிபலிக்கும் இச்சிலையை பிண்ணனியாக கொண்டு எல்லோரும் புகைப்படம் எடுத்துக்கொண்டு இருந்தார்கள்! ம்ம் இப்பொழுது புரிகிறது 'தி லேண்ட் ஆஃப் ரொமான்ஸ்' என ஏன் செல்லமாக அழைக்கிறார்களென்று:-)!!!

தி லேண்ட் ஆஃப் ரொமான்ஸ்...!

2011-05-30T22:30:00.003+02:00

காஸ்ட்லியாக ஒரு டூரிஸ்ட் ஸ்பாட் என்றால் சரியான இடம் பாரிஸ்தான். செல்ல காரண‌மாய் இருந்தது உறவினரின் திருமணத்திற்காக என்றாலும் கிடைத்த வாய்ப்பை சரியாக பயன்படுத்திக்கொள்ள முன் கூட்டியே விடுமுறை எடுத்துக்கொண்டோம். உறவினர்களின் அன்பு உபசரிப்பில் கொஞ்சம் வெயிட் போட்டும், வெயிலில் சுற்றியதால் கறுத்தும் சற்று இளைத்தும் பாரிஸில் பதினைந்து நாட்கள் நன்றாக சுற்றிவிட்டு திரும்பி இருக்கிறேன்.

ஆர்ப்பரிக்கும் மக்கள் கடல், வளைந்து நீளும் ரோடுகள், வானுயர்ந்த‌ கட்டிடங்கள், செதுக்கிவைத்த சிலைகள் என இயற்கையும் செயற்கையுமாய் விரிந்த காட்சிகள் எதையும் என் வழிப்பயணத்தில் ரசிக்க தவறவில்லை. தொலைவில் உள்ள பாரிஸுக்கு காரில் செல்வது கஷ்டமாக தெரிந்தாலும் என்னவரின் அழகான டிரைவிங்கும் மனதை வருடும் இனிமையான‌ பாடல்களையும் ரசித்தபடி சென்றது 860 கீலோ மீட்டரையும் வெறும் அறுபது கீலோ மீட்டராக்கி பயணத்தை இனிமையாக்கியது.

முதல் ஐந்து நாட்கள் திருமண வேலைகள், கொண்டாட்டங்கள் என கடந்துவிட, மீதி நாட்களை சரியாக ஒவ்வொரு நாளும் ஒரு சில இடங்களை காண‌ வேண்டும் என முடிவு செய்து அதன்படியே கண்டு ரசித்துவிட்டு வந்து இருக்கிறேன்.

உலக நாடுகளால் தி லேண்ட் ஆஃப் ரொமான்ஸ் என அழைக்கப்படும் பாரிஸ் ஐரோப்பிய நாட்டு மக்களையும் தாண்டி பல நாட்டினரை வசீகரிப்பதாகவே இருக்கிறது. பழமையும், புதுமையும் கலந்து பேரழகையெல்லாம் தன்னுள் வைத்திருக்கும் ஒரு அற்புத நகரம் !

உலக அதிசயங்களில் ஒன்றான‌ ஈஃபில் டவர் இங்கிருப்பதால் ஒவ்வொரு நாளும் அங்கே மக்கள் குவிந்திருப்பதை காணலாம். உச்சி வரை செல்ல படிகளும், 'கேபிள்கார்' எனும் லிஃப்டுகளும் உண்டு. இதற்கு தனித்தனியாக கட்டணங்கள் வசூலிக்கப்படுகிறது. மேலே ஏறியும் அல்லது கீழே தரையில் படுத்துக் கொண்டும் டவரை விதவிதமாக சுற்றுலாவினரின் புகைப்படங்கள் எடுக்கும் காட்சி அழகானதாக இருக்கிறது. முரட்டு கம்பிகளை கொண்டே மென்மையான பாரிஸின் அடையாளமாக திகழ்கிறது இந்த ஈஃபில் டவர்! நகரின் இடையே ஓடும் ஸீன் நதி டவருக்கு கூடுதல் அழகை சேர்க்கிறது.
மேலும் படங்கள்.....

இதை அடுத்து மக்கள் சேரும் இன்னொரு இடம் L' Arc de Triomphe (Triumphal Arch). பிரெஞ்சு புரட்சி போரில் வீர மரணம் அடைந்தவர்களின் நினைவாக மாவீரன் நெப்போலியன் மன்னரால் கட்டப்பட்ட இந்த இடம் பிரான்ஸ் நாட்டின் புகழ்பெற்ற monument ஆக‌ போற்றப்படுகிறது. நகரத்தின் முக்கியமான அடையாளமாக‌ இதை காணப்படுவதில் ஆச்சரியம் ஏதும் இல்லை அங்கு ஆர்ப்பரிக்கும் கூட்டத்தை பார்க்கும் போது. அந்த சாலைக்கே உரிய‌ அழகால் பல முக்கிய நிகழ்வுகளும் இங்கே நடத்தப்படுகிறது. எக்ஸ்பென்சிவ் அவின்யு என்றால் அது இந்த வளைவை சுற்றியிருக்கும் பகுதிகள்தான். மேலும் படங்கள்.....

ஓடும் காரிலிருந்தபடியே என்னவர் எடுத்த பட‌ம் இது... எப்பொழுதும் பிஸியாக இருக்கும் சாலை இந்த படம் எடுக்கும் நேரத்தில் மட்டும் பக்கா க்ளியராக இருந்தது!

எப்பொழுதும் சந்தோஷமான காட்சிகளை கொண்ட இப்பகுதியில் இளவரசி டயானா உயிர் விட்ட இடத்தை நெருங்கும் போது மட்டும் மனது என்னவோ போலாகிவிடுகிறது.

சுற்றுலாவினர் விரும்பி செல்லும் வரலாற்று சிற‌ப்புமிக்க மற்றுமொரு இடங்கள் கிறிஸ்துவ‌ பேராலயங்கள் : Cathedral - our lady of Paris & Basilica Sacred Heart of paris ! பேராலயங்களின் உட்புற வெளிபுறத்தில் தென்படும் அழகு, கலை நயமிக்கதாய் உள்ளது. நெப்போலிய மன்னர் பிரான்ஸ் நாட்டு சக்கரவர்த்தியாக முடிச்சூட்டிக்கொண்டது அவர் லேடி ஆஃப் பாரிஸ் பேராலயத்தில்தான்.ஆனால் சத்தமான‌ பேச்சுகளும் கேமிராக்களின் பிளாஷும் சத்தமும் மாதவின் பேராலயத்தை வெறும் சுற்றுலா இடம்போல காட்டியது.

இதற்காகவே Sacred heart ஆலயத்தின் உள்ளே புகைப்படம் எடுக்க அனுமதி இல்லை. அதனாலே ஆலயத்தின் உள்ளே செல்லும் போதே மனதில் அமைதி குடிக்கொள்கிறது. மற்ற ஆலயங்களைபோல் அல்லாமல் இந்த ஆலயத்திற்குள் மட்டும் அமைதியையும் அதன் தனித்தன்மையையும் பாதுகாத்து வருவதால் வெளிபுறத்தில் உள்ள‌ பார்கில் பொழுதை கழிக்கும் மக்களை காணமுடிகிறது. உயரமான பகுதியில் இப்பேராலயம் இருப்பதால் எப்படி ஈஃபில் டவரின் மேலிருந்து பாரிஸின் மொத்த அழகை காண முடிகிறதோ அதே போல் ஆலயத்தின் நுழைவு வாயிலில் இருந்து நகரத்தின் அழகை ரசிக்க முடிகிறது.

இந்த பஸிலிக்கா இருக்கும் பகுதியில் இன்னொரு சிறப்பும் உண்டு. ஆலயத்தை ஒட்டிய சாலைகளில் தெருவோர ஓவிய கலைஞர்களை பார்க்கலாம். நம்மை அமர்த்தி நிமிடங்களில் போர்ட்ரெய்ட் வரைந்துக்கொடுக்கிறார்கள்.
மேலும் படங்கள்.....

அடுத்து எனக்கு பிடித்த... மிகவும் ரசித்த லூவர் அருங்காட்சியகத்தைப்பற்றி சொல்ல வேண்டும். உலகின் மிகப்பெரிய அருங்காட்சியகங்களில் ஒன்றான‌ இதைப்பற்றிய விவரங்களை அடுத்த பதிவில் எழுதுகிறேன்.

பார்க்க வேண்டிய இன்னொரு இடம் The Palace of Versailles நகரத்தின் மையப்பகுதியில் இருந்து சுமார் இருபது கிமீ தொலைவில் பதினாறாம் நூற்றாண்டில் கட்டப்பட்ட அரண்மனை. பல அடுக்குகளையும் அறைகளையும் கொண்டு பார்ப்பதற்கே மிக பிரமாண்டமாய் இருந்தது. அரச குடும்பத்தினருக்காக தனித்தனியாக அமைக்கப்பட்டிருந்த கட்டிடங்கள் உள்ளே அழகாக தெரிந்த ராயல் அலங்கரிப்புகள் அனைத்தும் அவர்கள் வாழ்ந்த வாழ்க்கையை பிரதிபலிக்கிறது. பார்ப்பவர்களை கவரும் முக்கியமான இடம் அங்குள்ள Hall of Mirrors... அத்தனை அழகாக ஜொலிக்கிறது! அரண்மனை உள்ளே செல்ல நுழைவுக்கட்டணம் என்றாலும் அதன் சுற்றிலும் அமைந்துள்ள மிக பெரிய பார்க்கிற்க்கு அனுமதி இலவசம் என்பதால் அங்கு கூட்டம் நிரம்பி வழிந்தது. பாதுக்காப்பாக பராமரிக்கப்பட்டு வரும் தோட்டங்களில் ஆங்காங்கே இருந்த சிலைகள் கூடுதல் அழகை சேர்க்கிறது.
படங்கள் உள்ளே.....

பாரிஸின் கட்டிடங்கள் தெருக்கள் எல்லாம் பழமையின் பெருமை பேசிக்கொண்டு புதுமையாக‌ ப‌ளிச்சிடுகிற‌து. க‌ட்டிட‌ங்க‌ளின் ப‌ழ‌மையை பாதுகாத்து உள்ளே ம‌ட்டும் புதுபித்த‌ பராம‌ரிக்க‌ப்ப‌ட்டு வ‌ருகிற‌து.

பாரிஸின் சுற்றுலா தலங்களின் நுழைவுக்கட்டணங்களை விட அதிக பண‌ம் செலவாகும் இடம் என்றால் கார் பார்க்கிங்தான். அதே போல் இங்கு டிராபிக்கை கடந்து போக பொறுமை அவசியம். இதை சமாளிக்க முடியாமலே இங்கு வசிப்பவர்கள் பெரும்பாலும் வேலைக்கு சென்றுவர இருசக்கர‌ வாகனங்கள் அல்லது public transit பயன்படுத்துகிறார்கள்.

பாரிஸை சுற்றிப்பார்க்க சுற்றுலாவினர் விரும்பும் மாடி பஸ்!

அதேப்போல் ஈபில் டவரை சுற்றி உள்ள‌ பகுதியில் இருக்கும் ரெஸ்டாரண்டுகள் மிகவும் காஸ்ட்லியானது. விதவிதமாக ருசித்து சாப்பிடும் என்னவருடன் ஒரு நாள் அப்படி ஒரு பெரிய பிரெஞ்ச் ரெஸ்டாரண்டில் உணவருந்தினோம். இன்னொரு நாள் விலை மலிவாக உள்ள நம் தமிழ் ரெஸ்டாரண்டுக்கு சென்றோம். அங்கே தமிழ் நாட்டு உணவை ரசித்து சாப்பிடும் பிரெஞ்சுகாரர்கள் நிறைய பேரை பார்க்க முடிந்த‌து.

இந்தியர்களுக்காக ஒரு பகுதி... அங்கே தமிழ் பேசுபவர்களைதான் அதிகம் காணமுடிகிறது. காணும் இடங்களில் எல்லாம் 'சென்னை சில்க்ஸில்' தொடங்கி கடைகளின் பெயர்கள் எல்லாம் தமிழில்தான் இருக்கிறது. அங்குள்ள தமிழ் கிறிஸ்தவர்கள் சேர்ந்து தமிழிலேயே சிறப்பு ஆராதனைகள் ஆலய திருவிழாக்கள் என கொண்டாடி மகிழ்கிறார்கள். அதில் கலந்துக்கொள்ள வாய்ப்பு கிடைத்தது. சொந்தங்கள் தெரிந்தவர்கள் என அனைவரையும் கண்டு மகிழ்ந்தேன்.

பாரிஸிக்கு சென்று ஷாப்பிங் இல்லாமலா... நிறைய கடைகளை சுற்றி கைகளில் பைகளுடன் திரும்பினேன். பையில் யூரோ இருந்தா நிச்சயம் பாரிஸ் சொர்கம்தான்! நகரத்தின் முக்கிய வீதிகளில் உள்ள கடைகள் எல்லாம் மிக எக்ஸ்பென்சிவாக இருக்கிறது. அதனாலே கடைகள் எல்லாம் ராயலாக காட்சியளிக்கிறது. அதே வீதிகளில் கார் பிரியர்களை மகிழ்விக்கும் வண்ணம் அடுத்தடுத்து சில கார் ஷோரூம்கள் உள்ளது. கார் பிரியரான என்னவர் ஒவ்வொரு காரினையும் ஆர்வமாக ஆசையாக பார்க்க‌, நானும் சேர்ந்து ரசித்தேன்.

கார் தயாரிப்பில் ஐரோப்பியாவின் இரண்டாவது இடத்தில் இருக்கும் பிரெஞ்சு பிராண்ட் Peugeot! மற்ற கார்களை காட்டிலும் அனைவரையும் கவர்ந்ததாக இது இருந்தது.

அமைதியான சிறிய ஊரில் இருந்து சென்ற எனக்கு பாரிஸின் வேகம் சில சமயங்களில் சோர்வைக் கொடுத்தாலும் இரவு ப‌கல் பாராமல் தன் அழகால் அனைவரையும் மகிழ்விக்கும் நகரம் என்னையும் உற்சாகப்படுத்தி மகிழ்வித்தது.

ஓங்கி உயர்ந்த கட்டிடங்கள், சதா அங்குமிங்கும் அலைந்து திரியும் மக்கள் என தனக்கான காட்சியில் இருந்து சற்று மாறுப்பட்டுள்ள இந்த சாலையும் பாரிஸில்தான் உள்ளது...!!!

நான் பார்த்து இடங்களைப் பற்றிய சுற்றுலா அனுபவங்களை புகைப்படங்களுடன் உங்களுடன் பகிர்ந்துக் கொண்டதில் சந்தோஷம் என்றாலும் கேன்ஸ் திரைப்பட விழாவில் கலந்துக்கொள்ள முடியாமல் போனதில் கொஞ்சம் வருத்தம். பாரிஸில் உள்ளவர்கள் திரைப்பட விழாவிற்காக‌ இங்கு வர நானோ விழா நடைபெற்ற பதினைந்து நாட்களும் பாரிஸில் இருந்துவிட்டேன். இம்முறையும் கேன்ஸ் க்ளிக்ஸ் மிஸ்ஸாயிடுச்சி நண்பர்களே!

உல்லாச உலகம்...!

2011-05-03T23:52:00.000+02:00

சிவந்த‌ப் பாறைகள்... பசுமையான தாவரம்... நீலக்கடல்... பொன்னிற மணற்பரப்பு என மொத்த அழகினையும் தன்னுள் கொண்டு திகழும் இப்பகுதியின் பெயர் La Corniche de l'Estérel.

எங்கள் மாவட்டத்திற்கு வரும் பெரும்பாலான சுற்றுலாப் பயணிகளின் பொழுதுப்போக்கு இடமாக திகழ்கிறது இந்த கடற்கரை. சனி ஞாயிறுகளில் பரப்பரப்பாக காணப்படும் இப்பகுதி விடுமுறை நாட்களானால் திருவிழா கோலம் கொள்கிறது. பள்ளி ஆண்டு விடுமுறை தொடங்க இன்னும் இரண்டு மாதம் இருக்கும் நிலையில் சென்ற மாதம் விடப்பட்ட இரண்டு வார‌ ஈஸ்டர் விடுமுறையின் போதே இங்கு மக்கள் கூட்டம் அலைமோதியது. ஓங்கி உயர்ந்திருக்கும் சிவந்த‌ மலை பாறைகள்... Mediterranean கடல்; நடுவே பயணிக்கும் சாலை என இந்த littoral zone க்கு La corniche d'or(The Golden Cornice) என்னும் சிறப்பு பெயரும் உண்டு. வளைந்து நெளிந்து செல்லும் மலைப்பாதையில் வாகனங்களை நிறுத்தி கடலினையும் கடல் சார்ந்த பகுதிகளையும் பார்வையிட வசதியாக ஆங்காங்கே கார் பார்க்கிங் வசதி செய்யப்பட்டிருக்கிறது. அதேப்போல் கடலில் குளிப்பவர்களுக்காக சில பகுதிகள் ஒதுக்கப்பட்டு இருந்தாலும் பெரும்பாலான பாதுக்காப்பற்ற பகுதிகளெல்லாம் ஹெலிக்காப்டரில் இருந்து கண்காணிக்கப்படுகிறது.

சிவந்த பாறைகளில் மோதி சிதறித் தெறிக்கும் நீரின் அழகை காணும் பொழுது விழிக‌ள் இமைக்க மறுந்துபோய் விடுகிறது. இந்த அழகினை ரசிக்க ஆரம்பித்த பிறகு அதிலிருந்து பார்வையை திருப்ப‌ முடியாமல் மனம் அதிலே லயித்துவிடுகிறது; தங்கபோல் ஜொலிக்கும் மணல், வெண்பஞ்சு நுரைகளை அள்ளிவரும் அலைகள், பாறைகளை தொட்டு எழும்பும் நீரோசை, வட்டமிடும் பறவைகள், சிரிக்கும் பூக்கள், மிதமான வெயில், வருடும் காற்று, அனைத்தையும் மறந்து சந்தோஷத்துடன் குதுக்கலிக்கும் மக்கள், நிமிடத்திற்கு நிமிடம் மாறுகின்ற காட்சிகள் என ஒவ்வொன்றும் கவிதை சொல்கிறது...

கடலைகளின் தாலாட்டில் கரைந்துபோன

காலடி தடங்களை தேடி தேடி

தொலைந்துப்போனது

என் மனது!

கொட்டி கிடந்த ரம்மியங்களை

ஓடி ஓடி படம்பிடித்தது

என் ரசனை!

ரம்மியங்களை விவரித்து சொல்லும் கீழ் காணும் படங்கள் அனைத்தும் சென்ற ஞாயிறு அன்று என் கேமிராவில் க்ளிக்கியது.

காணும் காட்சியை ஓவியமாக்குபவர்...

வட்டமிடும் கடற்பறவை...

நிஜத்தில் மனம் கரைய..

கரையில் நிழல் கரைகிறது!

( படத்தில் நானும் என்னவரும்)

இறைவன் வரைந்த ஓவியங்கள்....

2011-04-19T15:00:00.000+02:00

ஒரு வழியாக குளிர் குறைந்துவிட்டது... காலநிலையில் ஏற்பட்டுள்ள மாற்றங்களினால் அழகாக இன்னும் அழகாக மெருகேற்றிக்கொண்டிருக்கும் இயற்கையினை, இறைவனால் வண்ணம் தீட்டப்பட்ட ஓவியங்களை ரசித்திட இருக்கண்கள் போதாது. ஊரெங்கும் மலர்ந்திருக்கும் மலர்களோ பல விதங்களில் பல வண்ணங்களில் அழகாய் காட்யளித்துக்கொண்டிருக்கிறது.

உங்கள் கண்களுக்கு விருந்தளிக்க போகும் கீழே மலர்ந்திருக்கும் படங்கள் சென்ற வாரத்தில் எடுத்தது. ஏதோ மலர் கண்க்காட்சியில் எடுத்தது என்று நினைப்பீர்களானால் தவறு! எங்கள் வீட்டில் இருந்து சுமார் பத்துகீமீ தொலைவிற்குள்ளே சாலைகளின் ஓரங்களில் மரங்களிலும், செடிகளிலும், மட்டுமல்லாமல் கொடிக‌ளில் மலர்ந்தும், நிலத்தினில் படர்ந்தும் இருக்க... மனதை கொள்ளைக்கொள்ளும் இந்த மலர்களை மிகவும் ரசித்து படம் பிடித்தேன்.

என் வீட்டு பூந்தொட்டியில் மலர்ந்திருக்கும் மலர்கள்....

எழுத்துக்களை கோர்த்து வாக்கியங்களாக்குவதை விட வண்ணங்களை குழைத்து ஓவியங்களாக்குவதே மிக சுலபமானதாக இருக்கிறது எனக்கு.

எழுதுவதற்கு தேவைப்படும் நேரத்தைவிட வரைவதற்கு தேவையான நேரம் குறைவு என்பதாலும் எப்பொழுதும் குறையாத கலை ஆர்வம் தொடர்வதாலும் கடந்த சில நாட்களாக‌ நிறைய‌ வரைந்துக்கொண்டிருக்கிறேன்.

இறைவன் படைத்த‌ ஓவியங்களோ அற்புதம்... அதற்கு நிகர் இல்லை என்பதால் அவற்றை ரசித்தபடியே இதோ நான் வரைந்த Magnolias roses(30x60cm)!

என்றும் கண்மனியாக... (தொடர்பதிவு)

2011-03-15T00:02:00.001+01:00

எனக்கு ஏன் இந்த பெயர் வச்சிங்க? பாருங்க யாருமே என் பேரை சரியா சொல்ல மாட்றாங்க?.... பள்ளி நாட்களில் பெரும்பாலும் இதுதான் என் புலம்பலாக இருந்தது. சரியாக உச்சரிக்க முடியாமல் அவரவர் அவர்கள் இஷ்டத்திற்கு சொல்லி அழைக்கும்போது எனக்கு எரிச்சலாக இருக்கும். அப்பொழுதெல்லாம் அம்மாவிடம் ஷார்ட் & ஸ்வீட்டா எத்தனை பெயர்கள் இருக்கு; அதில் ஏதாவது ஒரு பெயரை வச்சிருக்கலாமே, ஏன் இந்த பெயரை வச்சிங்கன்னு கேட்டிருக்கிறேன். அதற்கு அம்மா ஒரு குட்டி பிளாஷ் பேக் சொல்வாங்க.

பெயர் பிறந்த கதை...

எங்கள் குடும்பத்தில் ஆங்கில அல்லது பிரெஞ்ச் பெயர் வைப்பது சகஜமான ஒன்றுதான் என்றாலும் எனக்காக இந்த பிரெஞ்ச் பெயரை தேர்ந்தெடுத்தது என் பெரியம்மாதான். அம்மாவின் அக்கா அதாவது என் பெரியம்மா நான் பிறப்பதற்கு முன்னே இந்த நாட்டிற்கு(France) வந்துவிட்டார். மேலும் என் ஞானஸ்நான தாயாகவும்(Godmother) இருந்ததால் அவர் தேர்ந்தெடுத்த பிரெஞ்ச் பெயரையே என் பெற்றோர் எனக்கு வைத்தார்கள். மற்றபடி பிறந்த நேரம் நாள் என எதையும் பார்த்து பெயர் வைக்காமல் பிடித்த பெயரை சூட்டி மகிழ்ந்திருக்கிறார்கள்.

பள்ளியில்...

ஒரு சில நெருங்கிய தோழிகளை தவிர எனது பள்ளி நாட்களில் சக மாணவிகளாலும் ஆசிரியர்களாலும் எனது பெயர் படாதப்பாடுபட்டது. அவரவர் விருப்பப்படி பலவிதமான உச்சரிப்பில் என்னை பெயர் சொல்லி அழைப்பார்கள். சிலர் என்னிடமே எப்படி சரியாக சொல்வது என கேட்பார்கள். அச்சமயங்களில் அவர்களுக்கு சரியாக சொல்லி கொடுப்பதே என் வேலையாக இருந்துவந்தது. அதிலும் +1ல் பிஸிக்ஸ் மிஸ் என் பெயர் சொல்லும்போது வகுப்பில் லேசாக சிரிப்பு சத்தம் எழும்... அவ்வளவு போசமாக pronounce பண்ணுவாங்க. ஆரம்பத்தில் அமைதியாக இருந்த நான் பிறகு 'இல்ல மிஸ், அப்படி இல்ல இப்படிதான் சொல்லனும்' அப்படின்னு சொல்லிவிடுவேன். ஆனால் அந்த இரண்டு வருடமும் கடைசிவரை அவர்களால் சரியாகவே உச்சரிக்க முடியவில்லை.

கல்லூரியில்....

ஆனால் அது பள்ளிவரைதான் நீண்டது. கல்லூரிக்கு செல்ல ஆரம்பித்த பிறகுதான் எனது பெயரை எனக்கு பிடிக்க ஆரம்பித்தது. இலக்கியங்கள் படித்தவர்கள் என்பதாலோ என்னவோ என் கல்லூரி ஆசிரியர்கள் என் பெயரை மிக சரியாக உச்சரித்து அழகாக கூப்பிடுவார்கள். ஒருமுறை Literature வகுப்பில் Shakespeare பாடத்தில் (Shakespeare's play 'Much Ado About Nothing') என் பெயர் வர அதைப்பற்றி விளக்கிய மேடம் இது ஒரு பிரெஞ்ச் பெயர், லத்தின் மொழியில் இருந்து வந்தது எனவும், சரியாக உச்சரித்தால் அழகாக இருக்கும் என்று சொல்லி என்னைப்பார்த்து you know, you have such a beautiful and romantic name... என்றார்கள். அதுவரை அம்மாவிடம் தொடர்ந்துவந்த எனது பெயரைப்பற்றிய புலம்பல் அத்துடன் நின்றுவிட்டது. இப்படி பள்ளிதொடங்கி கல்லூரிவரை உடன்படித்தவர்களிடம் இருந்து என் பெயர் தனித்துதான் இருந்தது.

வேலையில்...

ஆனால் படிப்பு முடிந்து வேலைக்கு செல்ல ஆரம்பித்தபோது மீண்டும் பெயர் பிரச்சனை ஆரம்பித்தது. வேலைக்கு சேர்ந்த புதிதில் மாணவர்கள் என் பெயரை சொல்ல மிகவும் சிரமப்படுகிறார்கள் என்பதனை தெரிந்துக்கொண்டேன். அப்படியே விட்டு விட முடியுமா... அதுவும் இங்க்ளீஷ் டீச்சராக இருந்து கொண்டு! அதனால் சரியான உச்சரிப்பை சொல்லிக்கொடுத்துவிட்டேன். ஆனாலும் உடன் பணிபுரிந்து ஆசிரியர்களில் சிலருக்கு கடைசிவரை சரியாகவே சொல்ல வரவில்லை.

பிரான்ஸில்...

இது எல்லாமே இந்த நாட்டிற்கு வரும்வரைதான் தொடர்ந்தது. இங்குள்ளவர்களுக்கு மிக பரிட்சயமான பெயர் என்பதால் மற்றவர்களிடம் என் பெயர் சொல்லும்போதும் சரி மற்றவர்கள் பெயரிட்டு அழைக்கும்போதும் ச‌ரி மிக comfortableலாக ஃபீல் பண்ணுகிறேன்.

குடும்பத்தில்...

வெளியில் தான் என் பெயர் இப்படி... மற்றப்படி சொந்தத்தில் சரியாகவே சொல்லி கூப்பிடுவார்கள். அம்மா எப்பொழுதும் என்னை ம்மா, என்னடா எனவும் அப்பாவோ கண்மனி என்றுதான் சொல்வார்; அதிலும் அப்பா அயல் நாட்டில் பணிபுரிந்துக்கொண்டிருந்த சமயங்களில் அவரிடம் இருந்து வரும் கடிதங்களில் ஒருமுறை கூட என் பெயரை எழுதியதில்லை. ஏனெனில் அவருக்கு எப்பொழுதும் நான் கண்மனிதான். என் கண்மனி எப்படி இருக்கிறாள்? என் கண்மனி எப்படி படிக்கிறாள்? இப்படியாகத்தான் எழுதுவார். கூப்பிடும்பொழுதுமட்டும் மிக மெதுவாக என் பெயருடன் 'ம்மா' சேர்த்து அழைப்பார். இன்றும் அப்பாவின் கன்மணியாக‌ இருப்பதே பிடித்திருக்கிறது. வீட்டில் முதல் குழந்தை என்பதால் உடன்பிறந்தவர்களுக்கு எப்பொழுதும் நான் அக்காதான். அவர்கள் நண்பர்களும் தோழிகளும் கூட இன்றுவரை என்னை அக்கா என்றுதான் அழைப்பார்கள். என்னவர் என் அப்பாவை போலவே சாஃப்டாக பெயருடன் 'ம்மா' சேர்த்து அழைப்பார். அப்பாவின் குரலில் எப்பொழுதும் என் பெயர் ஓரே டோனில் ஒலிக்கும்; அதில் பாசம் மட்டுமே தெரியும். ஆனால் அப்பாவைபோலவே கூப்பிட்டாலும் என்னவரின் அழைப்பு ஒவ்வொன்றும் ஒவ்வொரு விதமாக இருக்கும். எதற்காக அழைக்கபடுக்கிறதோ அதை பொருத்து ஏற்ற இறக்கமாக‌ அமையும்.

சரி அப்படி என்னதான் உன் பெயர் என கேட்கிறீர்களா... எப்பொழுதும் என்னவரிடம் இருக்கும் இதோ என் வீட்டு சாவியுடனே சேர்ந்திருக்கும் இந்த கீ செயினில் எழுதியிருப்பதுதான். எஸ்... மை நேம் இஸ் பெயாத்ரிஸ்! மற்றவர்களால் சுருக்கமாக பெயா என்றே அழைக்கப்படும்; நான் விரும்புவதும் அப்படியே.

Origin of the name: Derived from the Latin beatrix (she who makes happy, she who brings happiness), which is from beātus (happy, blessed).

Pronounced: be-ah-TREE-che(Italian), BEE-ə-tris(English) BAY-uh-TREECE(French)

Meaning: Bringer of joy, Blessed

பதிவுலகில்...

சரி பெயாவாகிய நான் ப்ரியாவானது எப்படி? தமிழில் பதிவெழுத ஆசைப்பட்டு வலைத்தலம் ஆரம்பித்தபொழுது எனது முந்தைய‌ அனுபவங்களால் வேறு ஏதாவது ஒரு தமிழ் பெயரில் தொடங்கலாம் என்றெண்னி என் சொந்த பெயரை விட்டுவிட்டேன். சின்ன வயசில் இருந்து எனக்கு மிகவும் பிடித்த பெயர் ப்ரியா. இணையத்தில் ஒரு சில தமிழ் வலைத்தலத்திற்கு எனது கவிதைகளை ப்ரியா என்ற பெயரிலேயே அனுப்பினேன. அப்படியே பிரசுரிக்கப்பட்டது. சரி இதுவே நம‌து புனைபெயராக இருந்துவிட்டு போகட்டுமே என்றெண்ணி வலைத்தலம் ஆரம்பிக்கும் பொழுது ச்சும்மா ப்ரியா என்று வைக்க இன்று பதிவுலகில் அதுவே என் பெயராகிப்போனது. இடையில் எனது உண்மையான பெயருடன் எழுத ஆசை வந்தும் ஏனோ மாற்றாமல் அப்படியே விட்டுவிட்டேன். இன்று உங்களால் ப்ரியமாக ப்ரியா என்று அழைக்கப்படுவதில் எனக்கு சந்தோஷமே!

**********

சிறுவயதில் இருந்தே என் பெயரைப்பற்றி மனதுக்குள் இருந்தவைகளை இன்று உங்கள் முன்னால் வைக்க வாய்ப்பாக இருந்தது தோழி சுசியின் பெயர்க்காரணம் பற்றிய தொடர்பதிவு.

நன்றி சுசி!

இவற்றை தொடர்ந்திட

ரகு
ஆர்.வி.சரவணன்
சீமான்கனி
சிவா
அப்பாவி தங்கமணி

அவர்களை அழைக்கிறேன்!!!

துணியிலே கை வண்ணம்....

2011-03-01T21:00:00.000+01:00

தையல் என்பது மிக அற்புதமான கலை. அதிலுள்ளவைகளோ பலவகை. இந்த தையற்கலை காலத்திற்கேற்ப பல மாற்றங்களை கொண்டிருந்தாலும், உடை என்ற ஒன்று இருக்கும்வரை இதற்கு அழிவில்லை எனலாம்! அற்புதமான இந்த கலையை தொழிலாக்கி இன்று வெற்றிய‌டைந்து வருபவர்கள் ஏராளம் என்றாலும் கூட பெண்களுக்கு இது ஒரு சிறந்த பொழுது போக்காகவே இருக்கிறது. இந்த‌ பொழுதுபோக்கின் மூலம் உள்ளப்பயிற்சி பெற முடியுமாம். இதைப்பற்றி அதிகம் தெரியாது எனக்கு எனினும் மற்ற கலைகளைப் போலவே தைப்பதற்கும் பொறுமை, கிரியேட்டிவிட்டி மற்றும் கலையார்வம் அவசியம் என்பது மட்டும் நன்றாக புரிகிறது.

இப்பொழுது இதைப்பற்றி ஏதோ கொஞ்சம் பேசுகிறேன் என்றால் அதற்கு காரணம் பள்ளி பருவத்தில் எனக்கிதை அறிமுகப்படுத்திய சிஸ்டர் கிறிஸ்டின்தான். ஆறாம் வகுப்பு முதல் தொடர்ந்து மூன்று வருடம், ஒவ்வொரு வெள்ளிகிழமை மதியம் கடைசி பீரியட்டில் டிராயிங் அல்லது தையல் க்ளாஸ் இருக்கும். எப்பொழுதும் வரைவதைவிட தையல் வகுப்பைதான் அதிகம் எதிர்ப்பார்ப்பேன். காரணம் ஏதோ ஓரளவிற்கு வரைய தெரிந்ததால் சீக்கிரமாக எனது டிராயிங்கை முடித்துவிட்டு மற்ற தோழிகளுக்கு உதவி செய்துக்கொண்டிருப்பேன். ஆனால் தையல் பற்றி தெரியாததால் அதை கற்றுக்கொள்ளும் ஆர்வ‌த்தில் அந்த வகுப்பிற்காக‌ காத்துக்கொண்டிருப்பேன். சிஸ்டரும் மிக தெளிவாக சொல்லிக்கொடுப்பார்கள். என்னுள் உள்ள கலையார்வத்தினாலோ என்னவோ அவர் சொல்லிக்கொடுப்பதை அப்படியே செய்து பாராட்டைப்பெற்றுவிடுவேன். அதன்பிறகுதான் அம்மா வீட்டில் தைத்துக்கொண்டிருப்பதை கவனிக்க ஆரம்பித்தேன். ஆர்வம் பற்றிக்கொள்ள எனது ஏழாம் வகுப்பின் வருடக் கடைசியில் தையல் வகுப்பில் சிறிய அளவில் கொடுக்கப்பட்ட துணியில் எம்பிராய்டரி போட்டு அதையே சிறிய பைப்போல தைத்துவிட்டேன். அதை வீட்டிற்கு எடுத்து வந்து என் அப்பாவுக்கு பரிசாக கொடுத்தேன். அப்பாவும் ஆசையோடு பெற்றுக்கொண்டு அதில் பைபிள் வைத்துக்கொள்ள அவருடன் எடுத்துச்சென்றுவிட்டார்(அப்பா வெளிநாட்டில் பணிபுரிந்த சமயம் அது). இதோ இன்றுவரை பைபிளை சுமந்தபடி அந்த பை என் அப்பாவிடம் பத்திரமாக உள்ளது. அந்த மூன்று வருடங்கள் மட்டுமே ஊசியும் நூல்களும் என்னுடன் உறவாடியது. அதன்பிறகு படிப்பில் கவனம் அதிகமாகவே, தைப்பதை மறந்தே போனேன்.

மறந்துப்போனதை நியாபகப்படுத்தியது சென்றமாதம் ஒரு நாள் கடையில் நான் கண்ட தையலினால் செய்த‌ கிப்ட் ஒன்று. இதயம் வடிவில் அழகான இரண்டுவரி காதல் சொற்களுடன் இருந்த அதை எடுத்துப் பார்த்தபோதுதான் அது துணியில் எம்பிராய்டரி செய்யப்பட்டிருந்தது புரிந்தது. உள்ளே மறைந்திருந்த தையல் ஆர்வம் லேசாக எட்டி பார்க்க, நானும் தைப்பதற்கு தேவையானவற்றை வாங்கிக்கொண்டேன். மறந்துப்போன சிலவற்றை நியாப்படுத்தி இணையத்தின் மூலம் இன்னும் தெரிந்துக்கொண்டு இதோ மீண்டும் ஊசியை கையிலெடுத்திருக்கிறேன். தையல் வகைகள் பற்றி அதிகம் தெரியாததால் பூக்களிலிருந்தே ஆரம்பிக்கலாமே என்றெண்ணி ஏதோ எனக்கு தெரிந்தவற்றை கொண்டு நான் உருவாக்கியவை இது.

இது எப்படி உருவானது என்பதையும் கொஞ்சம் பாருங்களேன்.

எனது பள்ளி நாட்களின் போது செய்த தையலும் இங்கு உள்ளது... இதோ, அதையும் பாருங்கள்!!!

இயற்கையில் இத்தனை அதிசயங்களா.......!!!

2011-02-18T13:20:00.000+01:00

ஒரே ரசனை உள்ளவர்கள் வாழ்க்கையில் இணையும் போது வாழ்க்கையே ரம்மியமானதாகி விடுகிறது. எனது ரசனைகளேற்ற வாழ்க்கை துணை எனக்கு கிடைத்திருப்பதால் காணும் ஒவ்வொன்றிலும் இன்பம் அடைகிறேன். இயற்கையை ரசித்து வாழத்தெரிந்தாலே எப்போழுதும் மனதில் உற்சாகம்தான்... அதிலும் பிடித்தவருடன் எனும்போது காணும் அனைத்தும் சொர்க்கம்தான். இந்த நாட்டிற்கு வந்ததில் இருந்து எத்தனையோ அழகழகான இடங்களை எல்லாம் என்னை அழைத்துசென்று காண்பித்த என்னவர், இம்முறை சென்ற வாரக்கடைசியில் அழைத்துச்சென்றது கேன்ஸ் ஃபிலிம் ஃபெஸ்டிவல் நடக்கும் ஊரில் இருந்து பத்து கிமீ தொலைவில் ஆள் நடமாட்டம் இல்லாத காட்டுப்பகுதியை போல இருந்த ஒர் இடத்திற்கு!

நகரத்தில் இருந்து தனிமைப்படுத்தப்பட்ட அப்பகுதியில் சுற்றிலும் அடர்ந்திருந்த மரங்களின் நடுவில் ஒரே ஒரு கட்டிடம், பார்ப்பதற்கு வீடு போல் தோற்றமளித்தது. ஆனால் அதற்குள் இத்தனை அதிசயங்கள் நிறைந்திருக்குமா என எனக்கு அப்பொழுது தெரிந்திருக்கவில்லை. ஒருசில கார்கள் மட்டும் அங்கே நிறுத்தப்பட்டு இருந்தது. அதேப்போல சில குடும்பங்களும் காத்திருந்தனர். சரியாக மதியும் இரண்டு மணிக்கு பூட்டி இருந்த அந்த கட்டிடத்தின் கதவு திறக்கப்பட, எல்லோரும் உள்ளே நுழைந்தார்கள்... நாங்களும் பின் தொடர்ந்தோம்.

உள்ளே நுழைந்தவுடன் எதிரில் ரிசப்ஷன், வலதுபுறத்தில் சிறிய கடை இடதுபுறத்தில் சின்ன ரெஸ்டாரண்ட் என மிக எளிமையாக இருந்தது. ரிசப்ஷனிஸ்ட் வர, அனைவரும் டிக்கெட் வாங்கிக்கொண்டு காத்திருந்தோம். சிறிது நேரத்திற்குபின் அங்கு வந்து சேர்ந்தார் ஒரு கைட். காத்திருந்த 25 பேர்க்கொண்ட குழுவினை தன்னை பின் தொடருமாறு சொல்லி ரிசப்ஷன் பக்கம் இருந்த கதவினை திறந்தார். வியக்க வைக்கும் அதிசயங்கள் உள்ளே காத்திருந்தது தெரியாமல் அவரை தொடர்ந்துபடி படிக்கட்டுகளில் இறக்கிச்சென்றேன். ஆஹா, அதற்குள் ஒரு உலகம்.... கீழ் நோக்கியபடி 11 அடுக்குகளை கொண்டிருந்த Cavernனுடைய பெயர் Grottes de Saint Cézaire.

Cavern னை சுற்றி பார்ப்பதற்கு முன் அது பிறந்த கதையைப் பற்றி கொஞ்சம் தெரிந்துக்கொள்வோமே. 1890ல் Mr.Leon Dozol என்பவர் தன் தோட்டத்தில் திராட்சை செடிகளை நடுவதற்காக பள்ள‌ம் தோண்டி இருக்கிறார். சிறிய பள்ளம் தோண்ட முயன்றவர் ஆழமான குழியில் விழுந்துவிட பின் தன்னுடைய குடும்பத்தினரால் சிரமப்பட்டு வெளியே வந்து இருக்கிறார்.( படத்தில் வலதுபுறத்தில் இருப்பவர்தான் Mr. Dozol, அப்பொழுது இருந்த நுழைவு வாயிலில்...அவரது குடும்பத்தோடு!) அப்பொழுதுதான் கீழே பூமிக்கடியில் மிக பெரிய குகை இருப்பதாக தெரியவர‌ ஆவலுடன் தன் நண்பர்கள் மற்றும் தெரிந்தவர்களின் உதவியோடு மூன்று வருட முயற்சிக்குபின் கண்டுபிடிக்கப்பட்டதுதான் இந்த Cavern. த‌ன்னை தேடி வரும் நண்பர்கள் உறவினர்கள் என அனைவரையும் மெழுகுவத்தியின் வெளிச்சத்தில் இந்த இடத்தை சுற்றிக்காட்ட ஆரம்பித்து இருக்கிறார். பின் அந்த ஊருக்கு வரும் சுற்றுலாவினர் மெல்ல மெல்ல இதைப்பற்றி கேள்விப்பட்டு இவ்விடத்தை பார்க்க வர ஆரம்பித்துள்ளார்கள்.

1925ல் அதன் மேல் ஒரு கட்டிடம் எழுப்பி மின்சார வசதியும் கொடுக்கப்பட்டது. அதன் பிறகு 1926ல் Cavernனுக்கு மின்சார இணைப்பு கொடுக்கப்பட்டு பிரெஞ்சு அரசால் அங்கீகரிக்கப்பட்ட சுற்றுலா இடமாகி இன்று நூற்றுக்கணக்கான மக்களின் கண்களுக்கு விருந்தாக காட்சியளித்து கொண்டிருக்கிறது.
(மின்சார இணைப்பற்ற நிலையில் கையில் விளக்குடன் சுற்றி பார்த்தவர்கள்... 1926ல்!)

இந்த cavern பிறந்த கதை இதுதான் என்றாலும் அப்படி என்ன அதிசயங்கள் அதன் உள்ளே நிறைந்திருக்கும் என்பவர்களுக்காக இதோ நான் ரசித்து எடுத்து புகைப்படங்கள்!

உள்ளே இறங்க ஏற்படுத்தப்பட்ட வழி இதுதான்...

ஆனால் Mr. Leon Dozol கண்டுப்பிடித்த வழி.... இது!

இயற்கையில் இதெல்லாம் எப்படி சாத்தியம் என்றெண்ணியவாறு படம்பிடித்துக்கொண்டிருக்க, அந்த கைட் சொன்ன விளக்கங்கள் மேலும் ஆச்சிரியத்தில் ஆழ்த்தியது. Combination of chemical processes, erosion from water, tectonic forces, micro organisms, pressure, atmospheric influences, digging.etc என‌பலத்தரப்பட்ட geological processes மூலமே இப்படி உருவாகிறதாம். ஏதோ ஒன்றிரன்டு வருடங்கள் அல்ல பல நூற்றாண்டுக்களாக வள‌ர்ந்து வருகிறதாம். ஒவ்வொரு சொட்டு தண்ணீரும் பலவிதங்களில் வடிவம் பெறுவதை என்னவென்று சொல்வது! பூக்களைப் போலவும், பழவகைகளைப்போலவும், விலங்குகளைப்போலவும் தோற்றமளிக்கிறது.

கீழே காணும் படத்தில் இருக்கும் இடத்திற்கு திராட்சை குவியல் என்று பெயர்... மேலிருந்து சொட்டும் ஒவ்வொரு துளி நீரும் கல்லில் பட்டு சிதறும் போது இப்படி திராட்சை பழங்களைப் போல தோற்றம் பெற்றுள்ளது.

இயற்கையாகவே இப்படியொரு உருவம் பெற்ற Limestone....ஆச்சரியம்தானே!!!

இதற்கு ரோமியோ என பெயரிட்டு அழைக்கிறார்கள்!

இதோ, இந்த கட்டிடத்தின் கீழேதான் Cavern என்றால் நம்பமுடிகிறதா!!!

செயற்கையாக பல இடங்கள் மனிதர்களால் உருவாக்கப்பட்டு இருந்தாலும் இயற்கையே இப்படி பல வடிவங்களை கொடுத்திருப்பது அதிசயம்தானே. மேலும் அங்கு ஏற்றப்பட்டிருந்த விளக்குகளின் வெளிச்சத்தில் ஏதோ குகைக்குள் ஒரு தனி உலகமே தெரிவதுபோல தோன்றியது. அத்தனை அழகுடன் கண்களுக்கு மட்டுமில்லாமல் காதுகளுக்கும் விருந்தளித்து limestoneல் இருந்து எழும்பிய இசை... கேட்டு பாருங்கள், உண்மையிலேயே அதிசயம்தான்!

நேசித்து வரைகிறேன்!

2011-02-11T15:45:00.002+01:00

சின்ன வயதில் பென்சிலை பிடித்த கை இன்னும் அதை விட மறுக்கிறது. அதிலும் வரைவதற்கு என்கிறபொழுது இன்னும் விதவிதமாக அதை உபயோகப்படுத்தி பார்க்க முயல்கிறது. இங்குள்ள ஓவியர்கள் கடற்கரை சாலையில் வரைய அமர்ந்தாலே பெரும்பாலும் பென்சில் ஸ்கெட்ச்தான் பண்ணுவார்கள். அதிலும் Portraits தான் அதிகமாக இருக்கும். எனக்கும் சிறு வயதில் இருந்தே பென்சில் டிராயிங் மிகவும் பிடிக்கும் என்பதால் நிறைய பெயிண்டிங்ஸ் என தொடர்ந்தாலும் இடையிடையே இப்படி பென்சில் ஸ்கெட்ச் செய்வதுண்டு.

இயற்கை எழில் நிறைந்த இடங்களை வரைந்து பார்க்க வேண்டுமென்ற எண்ணம் எனக்கு நீண்ட நாளாக இருந்து வந்தது.

இதோ... இங்கே கீழே காணும் முதல் இரண்டு படங்கள் அப்படி முயற்சி செய்து பார்த்ததுதான்.

வரைந்தப் ப‌டங்களை கணினியில் ஏற்றியபோது தொடர்ந்த கலைத்தாகத்தால் மீண்டும் சில மாற்றங்கள் கொண்டன இவ்விருப்படங்களும்.... ஆனால் இம்முறை கணினியின் உதவியோடு! படங்களை காண.... இங்கே செல்லவும்.

பெயிண்டிங்ஸை போல் அல்ல பென்சில் ஸ்கெட்ச், வரைவது மிக சுலபம். அதிக நேரம் தேவைப்படுவதில்லை. பெயிண்ட்ஸ், பிரஷ்கள், கேன்வாஸ் போர்ட், பெயிண்டிங் மீடியம்ஸ்... என பொருட்கள் பரவி கிடக்கும் நிலையும் இல்லை... வேலை முடிந்த பிறகு பிரஷ்களை சுத்தமாக கழுவி வைப்ப‌தில் ஆரம்பித்து எல்லாவற்றையும் பத்திரப்படுத்தி வைக்கும் வேலையும் இதில் இல்லை. தேவைப்படுவது எல்லாம் ஒரு Paper, Pencil, Eraser மட்டுமே.

என்னென்னவோ வரைந்துப் பார்த்தாலும் பூக்களை வரைவதில் அலாதி பிரியம் இருக்கத்தான் செய்கிறது.

பொதுவாக பென்சில் ஸ்கெட்சில் ஆர்வம் உள்ளவர்கள் முதலில் பூக்களைக்கொண்டே தங்கள் வரையும் திறனை வளர்த்துக்கொள்ளலாம்.

வரையும் போது கவனிக்கப்பட வேண்டிய விஷயங்கள். மிக மெலிதான கோடுகளால் அவுட் லைன்களை போடவேண்டும். முடிந்தவரை அழித்து அழித்து கோடுகள் மேல் கோடுகள் வரைவதை தவிர்க்க வேண்டும். Pencil strokes பண்ணும்போது அழுத்தம் இல்லாமல் ஓரே சீராக இருக்க வேண்டும். தேவைப்படும் இடங்களில் மட்டும் மிக அழுத்தமான strokes கொடுத்து கான்ட்ராஸ்ட் காட்டலாம். இலைக்களுக்கு அப்படி செய்தால் நன்றாக இருக்கும். பின் cotton swab அல்லது tissue paper கொண்டு pencil strokesசை சற்று மெதுவாக தேய்த்துவிட்டால் போதும், சுலபமான பென்சில் ஸ்கெட்ச் ரெடி!

எனக்கே..... எனக்கானவனாய்!

2011-02-01T23:50:00.002+01:00

வெளியில் அழைத்துச்செல்கையில்
ஆசையுடன் பார்த்தாலே
பிடிச்சிருக்கா எனக்கேட்டு
விரும்பும் பொருட்களை
வாங்கி கொடுக்கும் போது
தாயாகிறாய்!
வீடு திரும்பியதும்
பசிக்கிறது எனக்கேட்டு
பாசத்துடன் நான் பரிமாறுவதை
ருசித்து உண்ணும் போது
சேயாகிறாய்!

தெரியாத நல்ல விஷயங்களை
பொறுமையாய்
விளக்கி சொல்கையில்
தாயாகிறாய்!
அதே அறிந்தவைகளை
தெரிந்தும் தவறிழக்க செய்துவிட்டு
செல்ல திட்டுகள் பெற்று
முழிக்கையில் சேயாகிறாய்!

உடல் நலக்குறைவால்
சோர்ந்துப்படுக்கும் எனக்கு
உணவளித்து மருந்தளிக்கையில்
தாயாகிறாய்!
நீயோ
உடல் நலமின்றி இருக்கும்போது
பக்கமிருத்தி என்னை
அணைத்துக்கொண்டு உறங்குகையில்
சேயாகிறாய்!

சோகங்களில் கலங்குகையில்
தலைக்கோதி
மார்பினில் சாய்த்து
என் நெற்றியில் முத்தமிட்டு
ஆறுதல் புரியும் போது
தாயாகிறாய்!
என்னடா... என்னாச்சிடா என்ற‌
அன்னையின் பரிவான‌
சொல்லுக்கு ஏங்கும் குழந்தைப்போல
மனதறிந்து கேட்கையில்
என் மடியிலே கலக்கங்களை
புதைத்துக்கொள்ளும் போது
சேயாகிறாய்!

இப்படி தாயாய் சேயாய் தொடர்கையிலும்
சின்ன சின்ன குறும்புகளுடன்
உணர்ச்சிகளை தூண்டும்போதும்......
செல்ல செல்ல சீண்டல்களுமாய்
சண்டை பிடிக்கும்போதும்......மட்டும்

நீ...
எனக்கே.....
எனக்கானவனாய் இருக்கின்றாய் !

தி ஆர்ட் ஆஃப் கோலம்!

2011-01-14T15:35:00.004+01:00

பொங்கல் என்றதும் சட்டென்று என் நினைவில் வருவது கோலங்கள்தான். தினந்தினம் கோலங்களால் வீட்டு வாசலை அழகுப்படுத்தும் நம் நாட்டுப் பெண்கள்தான் எத்தனை கலை நயமிக்கவர்கள்! அதிலும் இந்த திருநாட்களுக்காக‌ போடப்படும் கோலங்கள் கொள்ளை அழகுதான். என் சிறுவயதில் அம்மா கோலமிடுவதைக் கண்டு பிரமித்து இருக்கிறேன். அந்நாட்களில் பள்ளி செல்கையில் ஒவ்வொரு வீட்டு வாசலிலும் போடப்பட்டு இருக்கும் கோலங்களை கண்டு வியந்து, நமக்கும் இதுபோல் கோலம் போட வருமா, அதுவும் இவ்வளவு பெரியதாக எல்லாம் கோலமிட முடியுமா? என கேள்விகள் எழும்பும்.

அம்மா அவர்களுக்கென்று ஒரு நோட்டு புத்தகத்தில் நிறைய கோலங்கள் வரைந்து வைத்துக்கொள்வதை பார்த்திருக்கிறேன். அப்பொழுது நானும் உங்களை மாதிரி கோலம் போட வேண்டுமென அம்மாவிடம் சொல்ல, தனியாக பேப்பரும் பென்சிலும், அவ‌ர்கள் போட்ட கோலம் ஒன்றினையும் த‌ந்து, அதை பார்த்து போடச் சொன்னார்கள். புள்ளிகளை மிகச் சரியாக வைத்து முதல்முறையாக ஐந்துவயதில் ஒரு ஐந்துப்புள்ளிக் கோலம் போட்டது இன்றும் நினைவில் இருக்கிறது.

அம்மாவிடமிருந்து நிறைய பூக்கோலங்களை கற்றுக்கொண்டு வந்த போதிலும் என்னுடைய ஈர்ப்பு எப்பொழுதும் சிக்கு கோலங்கள் மீதே இருந்தது. ஏனோ அம்மாவிற்கு அதில் ஆர்வம் குறைவு... ஆனால் அதுதான் எனக்கு ரொம்ப பிடித்த ஒன்றானது. பின் அம்மாவை போலவே நானும் எனக்கென ஒரு நோட்டுபுத்தகம் உருவாக்கிக்கொண்டேன்; அதில் தொன்னூறு ச‌தவீதம் சிக்கு கோலங்கள்தான் இருந்தன.

எதையும் கற்றுக்கொள்ளும் புதிதில் அடிக்கடி செய்துப்பார்க்க தோன்றுமில்லையா, அப்படிதான் கொஞ்சம் வளர்ந்த பெண்ணான‌ பிறகு நானே விரும்பி தினமும் ஒரு கோலம் என்று போட்டு வந்தேன். ஆர்வமிகுதியால் பள்ளிவிட்டு வந்தபிறகு மாலையிலும் கோலமிடுவது சில நேரங்களில் தொடர்ந்தது. நான் கோலம் போட ஆரம்பித்த பிறகு நிறைய சிக்கு கோலங்கள்தான் எங்கள் வீட்டு வாசலை அலங்கரித்தது. அக்கம் பக்கத்து வீட்டில் இருப்பவர்களோ, வீட்டிற்கு வருபவர்களோ கோலத்தை பற்றி கேட்டுவிட்டால் போதும், அம்மாவோ பெருமையோடு "எனக்கு சிக்கு கோலமே வராது, ஆனா என் பொண்ணு என்ன சுலபமா போடுறா" எனச் சொல்லி சந்தோஷப்பட்டுக்கொள்வார்கள்.

கற்றுக்கொண்ட ஒன்று பழக்கமாகிப் போகும்போது ஆர்வம் குறைந்து போர் அடிக்க ஆரம்பிக்குமே... அப்படிதான், என் கல்லூரி நாட்களில் கோலம் போட என்னை எழுப்பும் அம்மாவிடம் அதெல்லாம் வேஸ்ட் ஆஃப் டைம் என்று சொல்லி மறுத்ததுண்டு(என்னசெய்வது அப்போதெல்லாம் தூக்கம்தான் மிகவும் பிடித்த ஒன்றாக இருந்தது) அப்பொழுதுதான் 'ஏன் கோலம் போடனும்... அதனால என்ன பயன்...' என அம்மாவிடம் கேள்விகள் கேட்க ஆரம்பித்ததின் தொடர்ச்சியாக அவற்றை பற்றி நான் தெரிந்துக்கொண்டவைகள்.....

A decorative appearance என்பதையும் தாண்டி ஆரம்ப கால‌ங்களில் அரிசி மாவினால் கோலம் போடப்ப‌ட்டதால் சின்னஞ்சிறிய உயிரினங்களுக்கு உணவாக இருந்திருக்கிற‌து என்பது நாமனைவரும் அறிந்ததே. காலையில் ஒளிரும் சூரிய ஒளிகதிர்களால் உடலுக்கு நல்லது என்றும், குனிந்து நிமிர்ந்து கோலமிடுவதால் பெண்களுக்கு உடற்பயிற்சியாகவும், முக்கியமாக Reproductive organs சிறந்தமுறையில் இயங்குவதற்கும் உதவுகிறதாம். மேலும் புள்ளிகள், கோடுகள், வட்டம், சதுரம்....என்று பலகோணங்களில் போடப்படுவதால் கோலங்களை Mathematical type of art என்றும் சொல்லப்படுகிறது; அழகு, ஆரோக்கியம், கணிதம், பக்தி என‌ அனைத்தையும் கொண்டு, கோலம் ஒரு பெண்ணுக்குள் இருக்கும் கலை உணர்வை வெளிக்கொண்டு வருகிறது. பொறுமை மற்றும் கான்ஸ்சென்ட்ரேஷன் பவரை அதிகப்படுத்துகிறது. இதையெல்லாம் விட சிக்கு கோலங்களைப்பற்றி எனக்கு தெரிந்த கேள்விப்பட்ட ஒன்றிது; எப்படி ஒரு புள்ளியில் ஆரம்பித்து, இருபது முப்பது புள்ளிகள்வரை நீண்டு, அவைகள் அத்தனையும் இணைத்து ஒரு கோலமாக்க முடிகிறதோ அதேப்போலதான், வாழ்க்கையில் எந்த மாதிரியான சந்தர்ப்பங்களிலும் பிரச்சனைகளில் இருந்தும் அழகாக சுமுகமாக நடந்துக்கொள்ள‌ கோலமிடுதல்… சிறந்த பயிற்சி அளிக்கிறதாம். இதோ... அத்தகைய சிறப்பு மிக்க சிக்கு கோலங்களை, என் நோட்டு புத்தகத்தில் நான் வரைந்து வைத்திருந்த ஒரு சிலவற்றை உங்களுடன் பகிர்ந்துக்கொள்கிறேன்.

இனிதாய் தொட‌ரும் (வாழ்க்கை)பயண‌ம்....

2011-01-08T15:00:00.000+01:00

பிரியமான பதிவுலக நண்பர்கள் அனைவருக்கும் இனிய புத்தாண்டு நல்வாழ்த்துக்கள். கடந்த வருடத்தில் கிடைத்த சிறந்த இணைய நட்புகளும், அறிந்தும் தெரிந்தும் கொண்ட விஷயங்களும் நல்லதொரு அனுபவங்களை பெற்று தந்தது. நள்ளிரவு குளிரில் நடுங்கியபடியே கடற்கரையில் கூடி இருந்த நூற்றுக்கணக்கான மக்களுடன் சேர்ந்து இப்புதிய வருடத்தை தொடங்கியதுகூட புது அனுபவத்தை தந்தது. இதோ கடந்துவந்த நாட்களை அசைப்போட்டபடியே நிகழ்கால நாட்களை ரசித்திட மேற்கொண்ட புதிய வருடத்தின் பயனமும் இனிமையாகவே அமைந்தது.

ஆல்ப்ஸ் மலைதொடர்களின் அடிவராத்தில அமைந்துள்ள ஒரு சின்னஞ்சிறிய ஊராகிய Laus க்கு செல்லும் போதே -3°c யில் சாலை எல்லாம் பனிமூட்டமாகவே இருந்தது. காலை நேர பனிபடர்ந்த‌ சாலைகள்தான் எத்தனை அழகு!

நகரத்து சத்தங்கள் ஏதுமின்றி இருந்த அந்த ஊருக்குள் நுழையும் போதே எதிர்க்கொள்ளும் அமைதி மனதிற்கு உற்சாகத்தை கொடுத்தது. இந்த ஊர் பிரபலமாவதற்கு காரணமாக சொல்லப்படும் ஆலயம் மிகவும் அழகாக இருந்தது.

இதுவரை நான் இங்கு பார்த்த ஆலய‌ங்களில் இருந்து இது சற்று மாறுப்பட்டு இருந்தது. வழக்கமாக ஆலய‌த்தின் பீடத்தில் அலங்கரிக்கப்பட்டிருக்கும் பூக்கள் இங்கில்லை. காரணம் ஆலயத்தின் உள்ளே நுழையும்போதே இயற்கையாவே வரும் மலர்களின் வாசம்தான் என சொல்லப்படுகிறது. ஏனோ எந்த வாசனையையும் நான் உணரவில்லை.

நாம் கடவுளிடம் பேசுவதற்கு இதுப்போல ஒரு புனித ஸ்தலம் தேவைப்படுகிறது என்பதை உணர்த்தும் விதமாக பல ஊர்களில் இருந்து நிறைய மக்கள் வந்திருந்ததை பார்க்க முடிந்தது. அமைதியாக இருக்கும் ஆலயத்தில் மக்களின் கண்ணீர் கலந்த வேண்டுதல்களை பார்த்தபோது சிலிர்ப்பாக இருந்தது. இப்படி இங்கு வேறெந்த ஆலயங்களிலும் நான் பார்த்ததில்லை.

பிரான்ஸின் லூர்து(Lourdes) நகரில் காட்சியளித்ததைப் போலவே மாதா இங்கேயும் 1664 ஆம் ஆண்டு பெனுவா எனபவருக்கு காட்சிக்கொடுத்து இருக்கிறார். அவர் தோன்றிய இடத்தில் எழுப்பப்பட்டிருக்கும் நினைவுச்சின்னம்தான் கீழே காணும் படம்.

ஆலயத்தை சுற்றிலும் ஒரே மாதிரியாக கட்டப்பட்டு இருந்த காட்டேஜ்கள் பார்ப்பதற்கு மிக அழகாய் தெரிந்தது. நல்லவேலையாக இன்னும் அந்த பகுதி Commercialized ஆகாமல் இருப்பதை பார்த்திட சந்தோஷமாக இருந்தது.அதேப்போல ஆலயத்தின் எதிர்புறத்தில் காட்சியளித்த பனிப்படர்ந்த மலைகளோ மனதை கொள்ளை கொள்ளும் அழகோடு இருந்தது.

Altitude அதிகமில்லாத போதும் குளிர் அதிகமாகவே இருந்தது. அங்கிருந்து கீழே இறங்கியபோது எதிர்கொண்டது Serre Poncon எனும் ஏரி, அதிகபட்ச பனியால் தண்ணீரின் அளவு குறைந்து உறைந்ததுபோல காட்சியளித்தது.

கடவுளால் ஆசீர்வதிக்கப்பட்ட ஊர் என்பதற்கு சான்றாக அங்கு நிறைந்துள்ள இயற்கை அழகுகள் ஒருபுறம் என்றாலும் அந்த ஊர் மக்களும் அவர்களது நல்ல உள்ளங்களும் இன்னொரு சான்று. ஏதோ பல நாட்கள் பழகியதைப் போல் பார்த்ததும் புன்னகைத்து பேசும் அவர்களது எளிமை எனக்கு மிகவும் பிடித்திருந்தது.

அடிக்கடி பார்த்துக்கொள்கின்ற போதும் புன்னகைக்க மறுக்கும் நகரத்து மக்களுக்கு இடையில் இந்த சின்னஞ்சிறிய ஊர் மக்கள் எப்பொழுதும் புன்னகைக்க மறப்பதில்லை. அவர்களுடன் பேசினாலே போதும், நமக்கும் உற்சாகம் தொற்றிக்கொள்கிறது, அத்தனை அன்பாக பேசுகிறார்கள். இவர்களது எளிமையான குணத்திற்கும் சிரித்த முகத்திற்கும் காரணம்.... இயற்கை எழில் கொஞ்சும் மலைப்பகுதியில் வசிப்பதா அல்லது உறுதியாக நம்பப்படும் இந்த புனித ஸ்தலமா... தெரியவில்லை! ஆனால் அங்கிருந்தவரை நானும் என்னவரும் இயற்கையை ரசித்து தெய்வீக சக்தியை உணர்ந்து சந்தோஷமாக கழித்த பொழுதுகளது!

ஒளி பிறக்க..... ஒளியேற்றுவோம்!

2010-12-21T23:32:00.000+01:00

எனக்கு பிடித்தவைகள் ஏராளமானவை என்றாலும் அவைகளில் ஒரு சில மட்டுமே நேசிக்கக்கூடியதாக இருக்கிறது. அப்படி மிகவும் நேசிக்கும் ஒன்று ஒளி. விழிகளின் வழியே எனக்குள் ஊடுருவி செல்பவைகளில் இவ்வொளி ஏனோ நீங்கா இடம்பிடித்து விடுகிறது. படர்ந்திருக்கும் இரவில் ஏற்றிவைக்கும் ஒரு சிறு ஒளி அந்த இடத்தையே அழகானதாக மாற்றிவிடுகிறது இல்லையா!

ஏன் எதற்காக தீபம் ஏற்றப்படுகிறது என்று அறியாமலே அதன் அழகுக்காக மட்டுமே விவரம் அறியாத வயதிலேயே கார்த்திகை தீபத்திருவிழாவினால் ஈர்க்கப்பட்டு எங்கள் வீட்டில் தீபம் ஏற்றும் பழக்கம் இல்லாதபோதும் அகல்விளக்குகளை வாங்கி வந்து வீட்டை தீபங்களால் அழகுபடுத்திக்கொள்ள ஆரம்பித்தேன். அதேப்போல் கிறிஸ்துமஸின் போதும் மெழுவத்தியினை கொண்டு அலங்கரிப்பது நான் மிகவும் நேசிக்கும் ஒன்று. சாதாரனமாக ஏற்றிவைக்கும் வத்தியுடன் கூடவே சில Christmas ornaments கொண்டு அலங்கரித்தால் இன்னும் அழகாக தோற்றமளிக்கும். இன்னும் கிரியேட்டிவாக செய்வதென்றால் இயற்கையாக கிடைக்கும் மலர்கள், இலைகள், சருகுகள், குச்சிகள் இவற்றில் எதைக்கொண்டு வேண்டுமானாலும் அலங்கரிக்கலாம். வெயில் பட்டவுடன் பூப்போல விரிந்து கிடக்கும் Pine cones கொண்டு அலங்கரிப்பது எனக்கு மிகவும் பிடித்த ஒன்று. கிறிஸ்துமஸ் அலங்காரப்பொருட்களில் இதற்கு முக்கிய பங்குண்டு. பூக்களைப்போல காட்சியளிக்கும் இவைகளுக்கு பல நிறங்களில் வண்ணந்தீட்டி தற்பொழுது கடைகளில் விற்கப்பட்டு வருகிறது. மலைப்பகுதிகளுக்கும் அடர்ந்த காட்டுப்பகுதிகளுக்கும் சென்று வரும் பொழுதுகளில் மரங்களினின்று கீழே விழுந்துக்கிடக்கும் Pine conesகளை சேகரித்து வைத்துக்கொள்வேன். நான்காவது மற்றும் கடைசிப்படத்தில் இருப்பது அதைக்கொண்டு அலங்கரித்ததுதான்.

Artificial flowers, Pine cones, Christmas balls, paper garlands.... இவைகளுடன் சிறியது பெரியதுமாக வண்ண மெழுகுவத்திகள் கொண்டு நான் உருவாங்கிய Candle decorations........ புகைப்படங்களாக்கி உங்கள் முன் வைத்துள்ளேன். ஆர்வம் உள்ளவர்கள் இதேப்போல் மெழுவத்திகளை கொண்டு உங்கள் வீட்டினை அழகுப்படுத்திக்கொள்ளுங்கள். வீட்டின் உள்ளமைப்புக்கு ஏற்றார்போல தேவைப்படும் நிறங்களில் அலங்கரிப்பது கூடுதல் அழகைக்கொடுக்கும். ஒளியினால் உங்கள் வீட்டின் அறை அழகாக தோற்றமளிப்பதோடு உங்கள் உள்ளத்து அறைகளும் ரம்மியமாக மாறிவிடும்.

இனிய கிறிஸ்துமஸ் மற்றும் புத்தாண்டு ந‌ல்வாழ்த்துக்கள்!!!

ஹேப்பி ஹாலிடேஸ்!!!!!

வளம்பெற வரம்தரும்... தேவதையில் நான்!

2010-12-14T17:15:00.000+01:00

சில மாதங்களுக்கு முன் 'உங்களை பற்றிய குறிப்புடன் புகைப்படமும் அனுப்பினால் தேவதை இதழில் பிரசுரிக்கப்படும்' என‌ இரண்டொருமுறை மெசேஜ் வந்திருந்த போதிலும் இது ஏதோ விளம்பரமோ அல்லது விளையாட்டிற்காகவோ என்றெண்ணி அதில் ஆர்வம் காட்டாமல் இருந்தேன். பதிவுலக நட்பின் மூலமாகதான் பின்னாளில் இவை நடந்தேற வேண்டும் என்று இருந்திருக்கிறதோ என்னவோ... இதோ இப்பொழுது தோழி ஒருவரால் இந்த மாத தேவதை இதழில் அறிமுகப்படுத்தப்பட்டு இருக்கிறேன். இன்று உத்தரவின்றியே உங்கள் வீடுகளில் நான் நுழைந்திருக்கிறேன்.

என்னை பற்றி நல்ல அறிமுகம் தந்து, எனக்காக சில பக்கங்களையும் ஒதுக்கி, எனது வலைத்தளமும் எனது ஓவியங்களும் இன்று... இன்னும் நிறைய தமிழ் மக்களை சென்றடைய செய்த தேவதை இதழ் நிர்வாக குழுவிற்கு எனது தாழ்மையான நன்றிகள். மேலும் அறிமுகம் என்ற பேரில் எனக்கு ஒரு அடையாளத்தை ஏற்படுத்தி கொடுத்திருக்கும் தேவதையின் பணி சிறந்திட‌ எனது வாழ்த்துக்கள்!

இவங்க என் பிரெண்ட் என சொல்லும்போதே பெருமை கொள்கிறது மனது; அத்தகைய நட்பினை பதிவுலகின் மூலமாக நான் பெற்றிருப்பதால் உண்மையிலேயே நான் அதிர்ஷ்ட‌சாலிதான். இன்று நான் தேவதையில் வர காரணமாயிருந்த தோழி விக்னேஷ்வரிக்கு எனது அன்பான நன்றி.

என் வலைப்பக்கத்தை தொடர்ந்து பார்வையிட்டும், விருதுகளினாலும், பின்னூட்டங்களினாலும் எப்பொழுதும் என்னை உற்சாகப்படுத்தி வரும் இணைய நண்பர்களுக்கு எனது ப்ரியமான நன்றிகள்! இன்று எனக்கென ஒரு அடையாளத்தை அடைய காரணம் நீங்களே! தொடர்ந்து உற்சாகப்படுத்தி வரும் உங்கள் பாசமான வார்த்தைகளால்தான் தொடர்ந்து எழுதி வருகிறேன்.

எல்லாவற்றிர்க்கும் மேலாக சிறந்த நண்பர்களையும் நன்மைகளையும் இதன்மூலம் தந்தருளும் இறைவனுக்கு என் முதன்மையான‌ நன்றி!

கல்லிலே கலைவண்ணம் தேடிய கண்கள்!

2010-12-10T18:55:00.000+01:00

கடற்கரைக்கு செல்வது என்பதே பிடித்தமான ஒன்றுதான். அதிலும் கடல் அலைகளை ரசிப்பதிலே தனிசுகம் இருக்கத்தான் செய்கிறது. இதற்காகவே கோடையில் மட்டுமல்லாமல் குளிர் காலத்திலும் சென்று வருவது எனக்கு மிகவும் பிடிக்கும். அப்படி செல்கிறபோது வெறும் கடல் அலைகளை மட்டும் ரசிப்பதோடு நிறுத்தி விடாமல் கடற்கரையில் பரவி கிடக்கும் பாறைகள், கற்கள் என அனைத்தையும் ரசிப்பதுண்டு. இயற்கையாகவே சில கற்கள் பல‌விதமான வடிவங்களில் இருந்தாலும்.... சில நேரங்களில் ஆச்சிரியப்பட வைக்கும் அளவிற்கு செதுக்கியது போல் இருக்கும். இப்படி கற்களில் கலையை தேடிக்கொண்டு இருந்த எனக்கு பாறை உடைந்து சிதறியதை போல் ஒரு கல் கண்ணில்பட்டது. அட, பார்ப்பதற்கு ஃபிரான்ஸ் மேப் மாதிரியே இருக்கே என்று நினைத்து கையில் எடுத்த எனக்கு ஆச்சிரியமாக இருந்தது! வேறு எந்த சப்போர்ட்டும் இல்லாமல் நிறுத்தி வைக்கலாம். காரணம், இயற்கையாகவே சமமாக அமைந்த அதன் அடிபாகம்தான். அதனால் இதில ஏதாவது செய்யலாமே என்றெண்ணி வீட்டிற்கு எடுத்து வந்துவிட்டேன். சென்ற சனிக்கிழமை கையிலெடுத்த கல்... வண்ணங்களின் கலவையில் ஒரு மணி நேரத்திற்கு பின் புதுவடிவம் பெற்றது.

இதோ எனது கண்கள் கண்டெடுத்த கல்லும் எனது விரல்கள் படைத்த ஓவியமும்!

இயற்கையின் எழிலில்... வண்ண ஓவியங்கள்!

2010-11-27T00:20:00.000+01:00

கொஞ்சம் சிரமமாக தெரிந்தாலும் இயற்கை எழில் கொஞ்சும் இடங்களை புகைப்படம் எடுத்து, பின்பு அதை பார்த்து வரைவது என்பது சந்தோஷம் தர‌க்கூடியதாகவே இருக்கிறது. அப்படி என்னால் வண்ணம்தீட்டபட்ட‌ ஓவியங்கள் மிக குறைவுதான். கீழே காணும் இரண்டு ஓவியங்களும் அப்படி வரையப்பட்டவைக‌ள்தான். முதல் முறையாக என்னவரின் கொலீக் ஒருவர் அவர் வீட்டு அருகாமையில் உள்ள சிறிய பாலத்தையும் அதன் கீழே ஓடும் ஓடத்தையும் ரசித்தவராய் அதை அப்படியே பெயிண்ட் பண்ணி தருமாறு என்னிடம் கேட்டுக்கொண்டவர், பின் அவரே அந்த இடத்தை புகைப்படமும் எடுத்து கொடுத்தார். சில நாட்களிலேயே அவர் விரும்பியபடி வரைந்துக்கொடுக்க, சந்தோஷமுடன் பெற்று சென்றார். இதேப்போல் நான் வரைந்த ஐந்தாறு ஓவியங்கள் என்னை நியாபகப்படுத்தியபடி எனது உறவினர்க‌ள், நண்பர்களின் வீடுகளில் இருக்கிறது.

இயற்கையை படம்பிடித்து வரைவது சிறப்பல்ல என்பதுபோல் இங்குள்ள சில ஓவிய கலைஞர்கள் அழகான இயற்கை எழில் நிறைந்த இடங்களை தேர்ந்தெடுத்து அங்கேயே அமர்ந்து வரைந்துக்கொண்டிருப்பதை பார்த்திருக்கிறேன். உயிரோட்டமுள்ள ஓவியமாக அவைகள் உருவாகிற‌தை காணும் போது அதிசயத்து நின்றிருக்கிறேன். இறைவன் நல்ல ரசனை உணர்வு நிரம்பிய நேரத்தில் படைக்கப்பட்ட பகுதி இந்த தென்பிரான்ஸ் என்று அடிக்கடி நினைத்துக்கொள்வேன், இங்குள்ள இயற்கை அழகினை ரசிக்கும்போது. அப்படி கடவுளால் தீட்டப்பட்ட ஓவியங்களை.... அத்தகையை இடங்களை ரசிப்பதோடு மட்டும் நிறுத்தி விடாமல் இங்குள்ள‌ சில ஓவிய‌கலைஞர்கள் உயிரோட்டமுள்ள‌ கலைப்படைப்புகளை உருவாக்குபவர்களாக இருக்கிறார்கள். தற்பொழுது சாத்தியமில்லை என்றபோதும், எனக்கும் ஆசைதான் என்றாவது ஒரு நாள் அவர்களை போல நானும் எழில் கொஞ்சும் இயற்கையினை என் கண்களினால் படம்பபிடித்தபடி வரைய வேண்டுமென்று. முயற்சிக்க‌வேண்டும்....!

பொக்கிஷம்!

2010-11-21T00:00:00.001+01:00

எண்ண‌ற்ற பரிசுகள்
உன்னிடமிருந்து
முதல்பார்வை கொண்டு
இன்றுவரை
ஒவ்வொன்றும்
ஒரு பொக்கிஷமாகவே!

ஜெபமாலை......
சிறிது ஏமாற்றம்தான் என்றாலும்
உன்னிடமிருந்து
முதலாய் வ‌ந்த பெருமையதற்கு...
தெய்வத்திடமிருந்தே ஆரம்பம்
நமதுறவு என்பதால்!

காய்ந்தப்பின்பும்
காதலுடன்
வாழ்ந்துக் கொண்டிருக்கிறது
நீ கொடுத்த ரோஜா.....
காலம் கடந்தும் தொடரும்
உன் அன்பைப் போலவே!

என்னில் நீ ரசிப்பவைகளில்
என்றும் முதலிடம் பிடிப்பது
என் நெற்றி பொட்டு......
அன்று நீ வாங்கிக்கொடுத்தது
இன்றும் என்னிடம்
பத்திரமாக‌!

குழந்தையின் பாதமாக
எண்ணி கொஞ்சிடும் நீ
அழகுபடுத்திட‌ பரிசளித்தாயே
தங்க கொலுசு......
என்றுமே என் கால்களை தழுவியபடி
வைக்கும் ஒவ்வொரு அடியிலும்
எழும் சலங்கை சப்தம்
உன்னை நினைப்படுத்திக்கொண்டு!

என்னை நினைத்து எழுதிய
கவிதை பக்கங்கள்….....
எனக்காக பார்த்து பார்த்து
வாங்கிய ஆடைகள்….....
கடைசியாக
என் பிறந்த நாளுக்கு
பரிசளித்த கைகடிகாரம் வரை
அனைத்துமே என்னிடம்
பொக்கிஷங்களாக‌……..

நமதுறவில் எழுதிய க‌விதையாய்
உன்னால் மட்டுமே தரக்கூடிய‌.....
தந்த உயிரின் பரிசைமட்டும்
தொலைத்து விட்டவளாய்
கண்ணீருடன் நான்!

பகிர்தலை நோக்கி....

2010-11-12T16:29:00.001+01:00

தொடர்ந்து பதிவெழுதுவதில் ஏனோ... தவிர்க்க முடியாமல் சிறு சிறு இடைவெளி வந்துவிடுகிறது. ஆனால் இந்த இடைப்பட்ட நாட்களில் நான் சந்தித்த சம்பவங்கள் மனிதர்கள் என் எல்லாமே சுவாரஸியமாக அமைந்துவிட, இங்கே சந்தோஷமுடன் அவற்றை உங்களுடன் பகிர்ந்துக்கொள்கிறேன்.

ஓவிய கண்காட்சிகளில் பங்குபெற நிறைய‌ வாய்ப்புகள் வந்துக்கொண்டே இருந்த போதிலும் விருப்பமில்லாமல் சில காலமாக தவிர்த்து வந்தேன். இம்முறையும் அப்படி ஒரு வாய்ப்பு தேடிவர தவிர்க்க முடியாமல் கலந்துக்கொண்டதற்கான‌ காரணம் இந்தியா நாட்டினை தலைப்பாய் கொண்டு நடத்தப்பட்டது என்பதால். மற்ற நாடுகளை பற்றியும் அவர்களின் கலாச்சாரங்களை பற்றியும் தெரிந்துக்கொள்வதில்தான் எத்தனை ஆர்வம் இவர்களுக்கு!

சமீப காலமாக‌ இங்குள்ள மக்கள் இந்திய நாட்டை பற்றி தெரிந்துக்கொள்வதில் அதிக ஆர்வம் கொள்கிறார்கள். கடந்த சில நாட்களாக‌ நடைப்பெற்றுக்கொண்டிருக்கும் விழாக்களே இதற்கு சான்று!நான் பணிபுரியும் இடத்தில் சென்ற மாதம் Voyage en Inde என்ற தலைப்பில் ஒரு மாலை பொழுதினை ஏற்பாடு செய்ய, இந்திய பெண்ணானதால் பாதிக்கு மேற்பட்ட பொறுப்பு என்னிடம் வந்து சேர்ந்ததுவிட்டது. நம் நாட்டின் முக்கிய அம்சங்களை விளக்கப்படங்களுடன் கட்டுரையாக தொகுத்து வழக்கியது, விழா நடைப்பெற்ற ஹாலின் வாசலில் கோலம் போட்டது, மாலை பொழுதினை சுவைத்து மகிழ்ந்திட சிற்றுண்டி தயார் செய்தது என..... இதற்கான தேடலின் போதுதான் நம் நாட்டை பற்றி இன்னும் நிறைய தெரிந்துக்கொண்டேன். இந்திய பெண் என சொல்லிக்கொள்வதில் பெருமையாகவும் உணர்ந்தேன்.

கோலமிட எதுவும் கிடைக்காத போதும் கிடைத்த ஒரு சில கலர் மணல்களை வைத்து அவசர அவசரமாக‌ கோலமிட்ட சில‌ நிமிடங்கள் மீண்டும் நம் தமிழ்மண்ணை நினைக்க வைத்தது. ஊரில் இருக்கும்போது நன்றாகவே கோலம் போடுவேன் என்றாலும் இங்கு வந்து இப்படி பிரெஞ்சு மக்களுக்காக என்ற போது ஏதோ முதல்முறை போன்றதொரு உணர்வு எற்பட்டது. எனக்கு உதவியாக ஒரு பிரெஞ்சு நண்பரும் மிகுந்த ஈடுபாட்டுடன் இணைந்து கோலமிட்டதை கண்டபோது மகிழ்ச்சியாக இருந்தது. கோலத்தை குறித்து நிறைய கேள்விகளை எழுப்பினர். அது ஆரம்பக்காலங்களில் எதற்காக போடப்பட்டது, அதனால் வரும் பயன் என்ன, இப்பொழுதும் தொடர்கிறதா என நம் நாட்டின் இந்த பழக்கத்தை கண்டு பிரமித்தனர்! நமது முன்னோர்களின் ஆழ்ந்த சிந்தனையையும் கலைதிறனையும் கேட்டு வியந்தனர்!

இந்தியாவிற்கு சுற்றுலா சென்று வந்த நண்பர் ஒருவர் slide projector ரில் இந்திய‌ புகைப்படங்களை காண்பிக்க‌...... பின்னணியில் இனிமையான கர்னாடக சங்கீதமும் இசைத்துக்கொண்டிருக்க‌, பருகிட தேனீர், கூடவே சம்மோசாவும், மசால வடையும் சுவைத்து மகிழ்ந்த சில மணி நேரங்கள் வந்திருந்த அனைவரும் இந்தியாவிற்கே பயணித்தது போல் இருந்தது என்றனர்.

இதேபோல் எங்கள் ஊரில் உள்ள‌ (Médiathèque) மீடியாசென்டரிலும் Novembre en Inde என்ற தலைப்பில் கடந்த சில நாட்களாக இந்திய சமையல், இலக்கியம், சினிமா, கோலமிடுதல், மியுசிக்கள் கான்ஃபெரன்ஸ், புகைப்படம் மற்றும் ஓவிய கண்காட்சியென ஒவ்வொரு நாளும் ஒவ்வொரு நிகழ்ச்சி நடைப்பெற்றுக் கொண்டிருக்கிறது.

இங்கு இந்திய மக்கள் அதிகமில்லாத பகுதி என்பதால் அடிக்கடி இந்திய பயணம் மேற்கொள்ளும் பிரெஞ்சு மக்கள் அனைவரும் சேர்ந்து இப்படி ஒரு பகிர்தலை மேற்கொண்டுள்ளார்கள். இவற்றின் நோக்கமே மற்ற நாடுகளின் மொழி, இனம், மதம், கலாச்சார பழக்கவழக்கங்கள்........ பற்றி தெரிந்துக்கொள்வதற்காகவே!

கடந்த வாரம் இரண்டு நாள் தொடர்ந்து நடைபெற்ற இந்திய சமையல் வகுப்புகளில் கலந்துக்கொண்டு வந்திருந்த பதினைந்துக்கும் மேற்ப்பட்ட பிரெஞ்சு பெண்களுக்கு நம் தென் இந்திய‌ சமையலை செய்துக்காட்டியது மிகவும் சுவாரஸியமாக இருந்தது. முதல்முறை இப்படி வெளியிடத்தில் சமைப்பது என்பது கொஞ்சம் சவாலாகவே தெரிந்தது எனினும் சரியான முறையில் சுவையாக செய்துவிட, அனைவரும் ஒன்று சேர்ந்து ருசித்து மகிழுந்தது நிறைவாக இருந்தது.

அடுத்து, அனைவரது பார்வைக்காக வைக்கப்பட்டிருக்கும் எனது ஓவியங்கள்.... கீழே காணும் படங்கள்.... சென்ற வாரம் எடுத்தது.

வழக்கம்போல எனது ஓவியங்களை காண்பவர்கள் கேட்கும் கேள்விக‌ள் "ஏதாவது டிராயிங் கிளாஸ்க்கு போயிருக்கிங்களா?","எத்தனை வருஷம் கத்துக்கிட்டீங்க?" என இம்முறையும் கேட்கப்பட.... "இல்லை, அப்படி எதுவுமில்லை. என் குடும்பத்தில் அனைவரும் ஓரளவிற்கு வரைய தெரிந்தவர்கள், அதனால் அது ஜீன் வழியாக‌ வருகிறதுன்னு நினைக்கிறேன்" என்ற எனது பதிலும் வழக்கமானதாக இருந்தது.

நிகழ்ச்சி அழைப்பிதழ்களிலும்.... நிகழ்வினை பற்றி வெளிவந்த செய்திதாள்களிலும் எனது பெயரை கண்டு மகிழும் உள்ளம்.........
நம் நாட்டை பற்றி ஆர்வமாய் பல வகையான கேள்விகள், நிறைய விமர்சனங்கள், ஒருவர் மற்றொருவருடன் தெரிந்த நல்ல விஷயங்களை பகிர்ந்துக்கொள்ளுதல் என இனிமையாக நகரும் நிகழ்வுகளில் நானும் கலந்துக்கொண்டதில் இந்திய பெண்ணாய் பெருமைகொள்ள‌தான் செய்கிற‌து.

நீங்காத அவளின் நினைவுகள்....

2010-10-13T23:45:00.000+02:00

புதிய நாடு, புதிய மனிதர்கள், புதிய உணவு வகைகள், புதிய பழக்கவழக்கங்கள் என எல்லாமே புதியதாக, இனிமையான தருணங்களையும் சந்தோஷமான நிமிடங்களையும் பெற்று தந்தது கடந்த வார ஸ்பெயின் பயணம். 400 கிமீ தொலைவில் இருக்கும் நண்பர் வீட்டிற்கு சென்று பின் அவர்கள் குடும்பத்துடன் சேர்ந்து சென்றுவந்த பயணம் கொடுத்த உற்சாகத்தில் மீண்டும் எனது ப்ரியமான பதிவுலக நண்பர்களை சந்திக்க வந்துள்ளேன்.

பிரான்ஸின் எல்லையை தாண்டிய அடுத்தடுத்த நிமிடங்களில் என்னற்ற மாற்றங்களை தந்து பிரமிக்க வைத்தது ஸ்பெயின். பிரான்ஸை ஒப்பிடுகையில் பொருட்கள் எல்லாம் விலை மலிவாக கிடைக்கிறது. வயிற்றிர்க்கு உணவளிக்கும் உணவகங்களில் செவிக்கும் விருந்தாக இசைக்கச்சேரிகள் நடைப்பெறுகிறது. பிரான்ஸை போல் அல்லாமல் இந்த நாடு தனது சட்டத்திட்டங்களில் சிலவற்றை தளர்த்தி இருப்பதை பார்க்க முடிந்தது.

(அங்கு அதிகமாக விற்கப்படும் dried Sausage!)

ஆனால் இந்த பயணத்தையும் விடுமுறை நாட்களையும் அர்த்தமுள்ளதாக்கியள்..... கமி.

எனக்கும் குழந்தைகளுக்குமான உறவு எப்பொழுதும் ஆழமுள்ளதாகவும் அர்த்தமுள்ளதாகவும் இருப்பதாகவே தோன்றும். இம்முறையும் என்னை அப்படி நினைக்கவைத்தவள் நண்பரின் நான்கு வயது மகள். அழகான குட்டி தேவதை. பொம்மை போன்றதொரு தோற்றம். இரண்டு வருடங்களுக்கு முன்பு சந்தித்ததை நியாபகத்தில் வைத்துக்கொண்டு தன் பெற்றோர் மூலம் எங்களின் வரவை தெரிந்துக்கொண்டவள் எங்களை கண்டவுடன் முந்திய‌ நாளே வரைந்து வைத்திருந்த படத்தை எங்கள் இருவருக்கும் பரிசளித்தாள்.

பின் அவள் அறைக்கு அழைத்து சென்று தன் குட்டி உலகத்தை பார்வையிட செய்தாள். அறை முழுவதும் கொட்டி கிடந்த விளையாட்டு பொருட்களின் நடுவில் அமர்ந்துக்கொண்டிருந்தவள் என்னையும் அழைக்க மீண்டும் குழந்தையாய் மாறிவிட்ட உணர்வில் அவளோடு கழிந்த நிமிடங்கள் இனிமையானது. Snow White, Cindrella, Beauty and the Beast, etc. கதைகளில் வரும் கதாபாத்திரங்களின் உருவ பொம்மைகளை வைத்துக்கொண்டு விளையாடுவது இவளுக்கு பிடித்தது என்றால், அதைவிட அதிகம் பிடித்தது வரைவதுதான்!

என்னை பற்றி தன் அம்மாவின் மூலம் தெரிந்துக்கொண்டவள், தனது டிராயிங் நோட்டு புத்தகங்களை கொடுத்து பார்க்க சொன்னவள், பின் அவளுடன் சேர்ந்து என்னையும் வரைய வைத்தாள். நேரம் போவதே தெரியாமல் நிறைய வரைந்தோம். அவளுக்கு நான் கற்றுக்கொடுத்தேன் என்பதைவிட அவளிடம் இருந்து நான் நிறைய கற்றுக்கொண்டேன்.

என் நெற்றியில் வைத்திருந்த பொட்டை பார்த்து கேட்ட கேள்வியில் ஆரம்பித்து இடைவிடாமல் நிறைய கேள்விகள் என எப்பொழுதும் பேசிக்கொண்டே இருந்தாள். பள்ளியில் மற்ற மாணவிகளை பார்த்துவிட்டு தனக்கும் அதுப்போல French braid போட்டு விட சொல்லி தன் அம்மாவிடம் நீண்ட நாளாக கேட்டு இருக்கிறாள். அவளின் அம்மா 'எனக்கு தெரியாது உனக்கு தெரிந்தால் போட்டுவிடு' என்றார் என்னிடம். கடந்த‌ சனிக்கிழமை அன்று அவள் விரும்பியபடி நான் போட்டு விட்டதும்தான் அவள் முகத்தில் எத்தனை மகிழ்ச்சி!

காரில் செல்லும்போது என் பக்கத்தில் அமர்ந்துக்கொள் என என்னை அழைத்து அவள் பக்கத்தில் அமர்த்திக்கொள்வதாகட்டும், ரெஸ்டாரண்டில் அவள் பக்கதில் என்னை அமர்த்திகொண்டு, நான் ஆர்டர் செய்த உணவு வர தாமதமாக, அவளுக்கான உணவு சீக்கிரம் வந்துவிட‌ சாப்பிட்டு கொண்டிருந்தவள் , பசிக்குதா வேணும்னா என் தட்டில் இருந்து எடுத்து சாப்பிடு' என்பதாகட்டும், அங்கிருந்து கிளம்பும் நேரத்தில் கூட‌ கொஞ்ச நேரம் என் கூட விளையாடிவிட்டு போ என்றவளின் ஆசையை நிறைவேற்றிய போதுமாகட்டும்... மீண்டும் குழந்தையாய் மாறிவிடமாட்டோமா என ஏங்க வைத்த இனிமையான தருணங்கள் அது!

மொத்தத்தில் இந்த பயன‌த்தை இனிமையாக்கியது குழந்தைக்கான இவளின் அடையாளங்கள்தான். இன்று என்னைவிட்டு பயனகளைப்பு நீங்கிவிட்டாலும் நீங்காமல் இருக்கிறது அவளின் நினைவுகள்.

ரசனை என்பது நிச்சயம் ஆண்பால்தான்!!!

2010-09-30T23:25:00.000+02:00

அழகு என்பது பெண்பால் என்றால்

ரசனை என்பது நிச்சயம் ஆண்பால்தான்!

மிக சாதாரனமாக‌ வசீகரிக்கும் ஒன்றைகூட ஆண்கள் ரசிக்க ஆரம்பித்துவிடுகிறார்கள். பெண்களின் ரசனை அமைதியானது என்றால் ஆண்களின் ரசனையோ ஆழமானதாக இருக்கிறது….குறிப்பாக பெண்களை ரசிப்பதில். பெண்கள் ஆண்களால் ரசிக்ககூடியவர்களாகவே படைக்கப்பட்டுள்ளனர். பெண்ணும் ஆணின் ரசனையாலேதான் அழகாக்கப்படுவதாக கருதுகிறேன். நம்மைவிட நமக்கு எது பொருத்தமாக இருக்கிற‌து என்பதில் இவர்களின் தேர்வு மிக அழகானதாக உணர்கிறேன். என் வாழ்வில் எனக்கு கிடைத்த ஆண்கள் அனைவருமே ரசனைமிக்கவர்கள் என்பதில் எப்போதும் எனக்கு பெருமை உண்டு. அப்பாவில் ஆரம்பித்து தம்பிகள், கஸின்கள், கல்லூரி நண்பர்கள், என்னவர் என அனைவருமே நல்ல ரசனை உணர்வு படைத்தவர்கள்தான்.

நான் பிறந்ததில் இருந்து இன்றுவரை என் செயல்கள் அனைத்தையும் ரசித்துக்கொண்டு இருப்பவர்… ஸ்கூல் யூனிஃபார்மில் இருந்து சுடிதாருக்கு மாறிய போதும் சரி, திருமணக்கோலத்தில் என்னை கண்ட போதும் சரி என்னை பார்த்து பார்த்து ரசித்து மகிழ்ந்த என் அப்பா………

அக்கா உனக்கு இது நல்லாயில்ல, இது நல்லா இருக்கும் என்பதாகட்டும், அதுவரை ப்யூட்டி பார்லர் போகாத நான் தோழியின் ஆலோசனைபடி என் நிச்சயதார்த்தம் அன்று மேக்கப் போட்டுகொண்டு வந்து நின்ற போது, ‘நீ சாதாரனமாவே நல்லாயிருப்பியே’ என்று சொன்ன‌ இவர்களின் விருப்பப்படி ப்யூட்டி பார்லர் போகாமலே திருமணத்திற்காக‌ நானே என்னை அலங்கரித்துக்கொண்ட போது ‘ஆங் இதுதான் எங்க அக்கா’ என சொல்லி என்னை மகிழ்வித்த தம்பிகள், கஸின்கள்………

நட்பின் உரிமையில் உனக்கு இதுதான் எடுப்பா இருக்கு, இந்த ஹேர் ஸ்டைல் நல்லா இல்ல, இந்த செருப்புதான் உன் காலுக்கு அழகா இருக்கு என சொல்வதில் ஆரம்பித்து, புரியும் செயல்கள் அனைத்தையும் உடன் இருந்து ரசித்து, இவர்கள் இத்தனை கூர்மையாக கவனிப்பார்களா, இவ்வளவு ரசனைமிக்கவர்களா ஆண்கள் என உணர்த்திய எனது கல்லூரி நண்பர்கள்……

என்னை ரசித்து பின் என் சின்ன சின்ன செயல்களையும் ரசித்து, இந்த பிறவியை ரசித்து வாழ்ந்திட இறைவன் எனக்களித்த வரமாக நான் நினைக்கும் என்னவர்……

இவர்களை தொடர்ந்து இன்று நான் சந்தித்து வரும் இனைய நண்பர்கள்.... இவர்களை பற்றி என்ன சொல்வது!!! நான் வரைந்த சித்திர பெண்ணழகை ரசித்து வர்ணித்து இவர்கள் எழுதிய கவிதைகள் படியுங்கள், உங்களுக்கே புரியும்... ஆண்கள் எவ்வளவு ரசனை மிக்கவர்கள் என்று. ஓவிய பெண்ணிற்கே கவிதையால் உயிர் கொடுக்க‌ நினைக்கும் ஆண்கள் இவர்கள். இப்பொழுது சொல்லுங்கள் தோழிகளே, ரசனை என்பது நிச்சயம் ஆண்பாலாகத்தானே இருக்கமுடியும்!!!

துப்பட்டா தேவதை

தென்றல் காற்றில்

பறக்கும் பார்வையை

வீசி செல்லும்

யார் இந்த

தேவதை

துப்பட்டா

தாரிகை !!!

…சிவா

துப்பட்டா என்னும்

என் தேவதையின் சிறகுகள்

பறக்கத்தானே செய்யும்..

…ப்ரியமுடன் வசந்த்

துப்பட்டாவில் படபடக்குதென் உசிரு

உன் பார்வை பட்டு(ப்) புள்ளியானேன்

கட்டிக் கொள்ளு இல்லைக் கண்ணை மூடு! :)

…பாலன்

தேவதைக்கு இறகு இருக்குமாம் - பறக்க

ஆனால் பார்தவர்கள் யாரும் இல்லை

இன்று

உன் வண்டியில் நீ வரும் போது

காற்றில் பறந்த உன் துப்பட்டா - என்

கண்ணுக்கு தெரிந்தது அது இறகாக

…புதுவை சிவா

ராத்திரி வானின் ஒரு துண்டை

ரகசியமாய் திருடிவந்து

துப்பட்டா செய்திருக்கிறாய் காற்றில்

துடித்து பகல் வானத்திடம்

ஒழுங்கு காட்டுகிறது உன் துப்பட்டா...

…சீமான்கனி

சுருண்டு நெளிந்து நீண்டு விழும்

கூந்தல் அருவியில்

சிக்கிக் கொள்ளும் ஒரிதழாவாவது

மாறேனோ?

…பாலாஜிசரவணா

பாவையின் பார்வையிலே

பொய் கோபம் தெரியுதடி

கோவலன் நானிலையோ

கோபிக்க மாட்டாயோ

…தினேஷ்குமார்

குளிர் நிறை கண்கள்

மடல் விசுறும் போதும்

தேன் இனிக்கும் உதட்டில்-தீந்

தமிழ் நழுவும் போதும்

காணமுடியா இடை

தாளமிடும் போதும்

காற்றிலே சேலை
வானவில்லான போதும்

நான் செத்து செத்து பிழைக்கிறேன்

உனை தொட்டுவிட துடிக்கிறேன்

…யாதவன்

ஒ பெண்ணே எனக்கு மட்டும்

உயிர் கொடுக்கும் சக்தியிருந்தால்

நொடியில் உன்னை என்னவளாக

மாற்றியிருப்பேன் .காலந்தோறும்

கவிபாடியிருப்பேன் இப்படி ஒற்றை

கவியில் புலம்ப வைத்து விட்டாயே..!!

…ஜெய்லானி

அழகு என்பது நிச்சயம் பெண்பால்தான்!!!

2010-09-23T17:10:00.001+02:00

« அழகு என்பது ஆண்பாலா பெண்பாலா
என்பதில் எனக்கு சந்தேகம் தீர்ந்தது
அழகு என்பது நிச்சயம் பெண் பாலடா
ஏஹே... கவிதை என்பது மொழியின் வடிவம்
என்றொரு கருத்தும் இன்று உடைந்தது
கவிதை என்பது கன்னி வடிவமடா »

"ஷாஜகான்" படத்தில் "மின்னலை பிடித்து மின்னலை பிடித்து" பாடலில் வரும் வரிகள் இவை. இந்த பாடலை கேட்கும் போதெல்லாம் எவ்வளவு அழகாக பெண்னை ரசித்து எழுதப்பட்டு இருக்கிறதே என்று நினைத்துக்கொள்வேன். ஒவ்வொரு பெண்ணும் ஒவ்வொரு விதத்தில் அழகுதான். ஒரு பெண்ணாக பெண்களை வரையும் போது இந்த பாடல் வரிகள்தான் நினைவில் வரும். ஏனோ என்னையும் அறியாமல் பெண்களை வரையும் போது மட்டும் இந்த பாடலை முனுமுனுத்தபடி வரைகிறேன்.

மேலே உள்ள படங்கள் அனைத்தும் நம் தமிழ் வாரப்பத்திரிக்கைகளை பார்த்து வரைந்தது. நான் வரைபவைகளை ரசித்து தொடர்ந்து பின்னூட்டமிடும் (ஆண்)நண்பர்கள் வழக்கம் போல் நன்றாக வரைந்து இருக்கிறீர்கள் என சொல்லாமல் இந்த சித்திரப் பெண்ணழகை பற்றி 'கனவு கன்னிகையோ.... காதல் தேவதையோ....' என எப்படி தோன்றினாலும் கவிதையாக எழுதிவிடுங்கள். காரணம் அழகு என்பது பெண்பால் என்றால், ரசனை என்பது நிச்சயம் ஆண்பாலாகத்தான் இருக்க முடியும்!

சொர்க பூமி!!!

2010-09-14T15:10:00.000+02:00

கோடை விடுமுறை என்றாலே பெரும்பாலான மக்கள் தேடி வருமிடம் கடல்களாகத்தான் இருக்கும். பூமியின் மேற்பரப்பில் மூன்று மடங்கு தண்ணீரால் அமையப்பெற்றுள்ளது இப்படி நாம் அனைவரும் அனுபவிக்கத்தானோ என தோன்றியது கடற்கரையில் குவிந்திருந்த‌ கூட்டத்தை காண்கின்ற போது. அதிலும் நாங்கள் வசிக்கும் பகுதி மிகசிறந்த சுற்றுலா தளம் என்பதற்கு அடையாளமே இந்த கடல்கள்தான்.

குறிப்பிட்டு சொல்லவேண்டும் என்றால் வெளி நாட்டினருக்கு நன்கு தெரிந்த Saint Tropez எனும் ஊரும் அங்குள்ள Pampolonne Beech ம்தான். சொந்த கப்பலகளில் வந்திறங்கும் வி.ஐ.பிகளை வித விதமாக புகைப்படம் எடுத்து லட்சக்கணக்கில் காசு பார்த்திட விலை உயர்ந்த கேமராக்களுடன் காத்திருக்கும் பாப்பராஸிகள்(Paparazzi) ஒரு புறமும் கடற்கரை ஓரமாக நிறுத்தப்பட்டு இருக்கும் கப்பல்களை காண்பதற்காகவே கூட்டம் கூட்டமாக காத்திருக்கும் மக்கள் இன்னொரு புறமும் என்று கடந்த‌ இரண்டு மாதமும் ஊரே விழாகோலம் கொண்டிருந்தது. சாதாரண மக்களில் இருந்து வி.ஐ.பிகள் வரை தன் வசப்படுத்தி வைத்திருக்கும் கடல் மகத்தானதுதான் !!!

என்னை சுற்றி சூழ்ந்துள்ள கட‌லலைகளின் தாலாட்டிலே எப்பொழுதும் நான் வாழ்ந்துக்கொண்டிருப்பதாக தோன்றும். தவழ்ந்து வரும் கடலலைகளில் மன‌ம் நனைய சலிக்க சலிக்க அதன் அழகினை ரசித்துவிட்டேன். ஆனாலும் மனம் மீண்டும் மீண்டும் தண்ணீரை நோக்கியே செல்கிறது. கோடை விடுமுறையின் கடைசி நாட்களில் அழகான சொர்க பூமிக்கு பயணமானோம்.

நகரத்து இரைச்சலும், செல்போல் மணியும் அலுத்து போகிற போது இப்படி ஏதாவது அமைதியான இடங்களுக்கு சென்று வருவது வழக்கம். எங்கள் வீட்டில் இருந்து 40 கிமீ தொலைவில் உள்ள சின்னஞ்சிறிய‌ ஊர் அது. கார் பார்க்கிங்கில் இருந்து 2கிமீ நடந்து செல்ல வேண்டும். நடைப்பாதையின் இருபுறமும் அடர்த்தியான மரங்கள் மெல்லிய காற்றுடன் வரவேற்கிறது. கொஞ்சம் கூட மாசு படியாத சுத்தமான காற்றினை சுவாசிப்பதை உள்ளே நடக்க ஆரம்பித்த சில நிமிடங்களிலே உணர முடிந்தது. கண்ணுக்கு எட்டிய தூரம் வரை சுற்றிலும் பசுமை கண்களுக்கு விருந்தாக அமைந்தது.

நகரத்து ஆரவாரமற்ற அப்பகுதியில் தூரத்தில் இருந்து எங்கோ நீர் வீழ்ச்சியின் மெல்லிய ஓசையை மட்டுமே கேட்க முடிந்தது. அதை நெருங்க நெருங்க கொட்டும் நீரின் சத்தமும் அதிகமாக‌ நம்மை நனைக்கும் சாரலை நன்றாக உணர முடிந்தது. தூரத்தில் இருந்து பார்க்கும் போது ஏதோ மலைகளின் நடுவில் வெள்ளை நிறத்தில் போடப்பட்டு இருந்த ஒரு கோடு போல தெரிந்தது.

சரியான பாதை அமைக்கப்படாததால் நடப்பதற்கு சற்று சிரமமாக இருந்தது. ஆனாலும் தூரத்தில் இருந்து வந்த அருவியின் சத்தம் ஆவலை தூண்டி நடையில் வேகத்தைக் கொடுத்தது. நாங்கள் சென்ற பாதை மலையடிவாரத்தில் அழகாக ஓடிக்கொண்டு இருந்த நதியிடம் கொண்டு சேர்த்தது. சுற்றிலும் பசுமை போர்த்திக்கொண்டு இருந்ததால் தண்ணீரின் நிறமும் பச்சையாகவே காட்சியளித்தது.

அருவியினை அருகில் சென்று பார்க்கலாம், தண்ணீரில் நனைந்துவிட்டு வரலாம் என ஆவலுடன் அதை நெருங்கும் பாதையில் நடந்து சென்றோம். ஆனால் அங்கிருந்த எச்சரிக்கை பலகையை பார்த்தவுடன் பெரிய ஏமாற்றமாக இருந்தது. மலை பாறைகள் சரிவதாலும் அதனால் சிறு சிறு கற்கள் கீழே விழுவதாலும் அங்கே சரியான பாதை அமைக்க வேலை நடந்துக்கொண்டிருப்பதால் தற்காலிகமாக அத‌ன் வழியை தடைசெய்து கம்பிகளை கொண்டு மூடி இருந்தார்கள்.

நாமெல்லாம் என்னைக்கு விதிகளை கடைப்பிடித்து இருக்கிறோம் என்பதை போல ஒரு சிலர் அந்த கம்பிகளை ஒரு ஓரமாக நகர்த்தி வைத்துவிட்டு அந்த பாதையில் செல்வதை பார்த்தோம். அன்று விடுமுறை நாள் என்பதால் வேலையாட்களும் இல்லை.

‘இவ்வள‌வு தூரம் வந்து அருவியின் அருகில் சென்று பார்க்காமல் போவதா’ என என்னவர் என்னை அந்த தடை செய்யப்பட்ட பகுதிக்கு அழைத்தார். ‘இல்லை ஆபத்து அதிகம் இருப்பதால்தான் அந்த பாதையில் செல்ல தடை செய்திருக்கிறார்கள். அதை மீறுவது பாதுகாப்பானது அல்ல, நாம் இன்னொரு நாள் வரலாம்’ என மறுத்துவிட்டேன். என்னை போல அந்த பாதையில் செல்ல விரும்பாமல் ஒரு பெண் தன் குழந்தையுடன் எச்சரிக்கை பலகையின் அருகில் நின்றிருந்தார். அந்த பெண்ணின் கணவரும் மகனும் மட்டும் அந்த பாதையில் நுழைந்திருக்க வேண்டும். அங்கேயிருந்து அச்சிறுவன் அவன் அம்மாவிற்கு "இந்த பகுதியில் எந்த ஆபத்தும் இல்லை. அதனால் பயம் வேண்டாம், தைரியமா வாங்க. அருவியினை அருகில் பார்க்க அழகா இருக்கு" என அழைப்பு விடுத்தான். அப்பொழுதுதான் அந்த பெண்னை கடந்து சென்றுக் கொண்டிருந்த எங்களுக்கு அச்சிறுவனின் வார்த்தைகள் காதில் விழ தானாகவே என் கால்கள் நின்றது. ஒரு நிமிடம் பக்கம் இருந்த என்னவரை ‘நாமும் போகலாமா’ என்பதை போல பார்க்க, அவரும் என் பார்வையின் அர்த்தம் புரிந்தவராய், அதற்காகவே காத்திருந்தவராய் என் கையை பிடித்துக்கொள்ள, மீண்டும் வந்த வழியே திரும்பி, அப்பகுதிக்குள் நுழைந்து, கரடு முரடான வழியில் ந‌டந்துச்சென்றோம்.

முன்னேறி செல்ல செல்ல பன்னீர் தெளித்து வரவேற்பதை போல் இருந்தது மேலே பட்ட சாரல். மிதமான வெயில், மலைகளில் இருந்து கொட்டும் தண்ணீர், அதன் மெல்லிய‌ சத்தம், நனைக்கும் சாரல்...... இப்படி அதன் இனிமையை உணர்கிற போது மனதில் ஏற்பட்ட ரம்யமான உணர்வுகளை எப்படி வார்த்தைகளில் சொல்வது! அது ஒரு சொர்கபூமி என்றுதான் சொல்ல தோன்றுகிறது. சொர்கமாய் தெரிந்த அந்த இடத்தின் பெயர் இதுதான்…Sillan la cascade !

அருவியை நெருங்கியும் இதற்கு மேல் எச்சரிக்கையை மீறுவது தவ‌று என்பதால் அன்று அங்கு யாருமே தண்ணீரில் இறங்கி குளிக்க முன் வரவில்லை. மாறாக முழுக்க முழுக்க கண்களுக்கு விருந்தளித்த காட்சியினை அனுபவித்து திரும்பினர்.

எதையும் அமைதியாகவே எதிர் நோக்கும் என்னை போலவே அங்கு ஒரு பறவை அமைதியாக தனிமைமையில் யார் வரவையோ எதிர்ப்பார்த்து காத்திருந்தது.

இத்தனை ரம்யமான தருணங்களை, தண்ணீரின் இனிமையினை மனிதர்களாகிய நம்மால் மட்டும்தான் உணரமுடியமா இல்லை இல்லை அனைத்து உயிரினங்களுக்குமே பொதுவானதுதான் என தோன்றியது அந்த பறவையினை பார்த்தபோது.

"நீரின்றி அமையாது உலகு"!!!!!

பிரியமானவர்களுக்கு.....

2010-09-01T23:53:00.000+02:00

என் மனசு நிறைஞ்சிருக்கு, மனசுல பட்டதை சொன்னேன், மனசுக்குள்ளேயே பேசிக்கிட்டேன், மனசே சரியில்ல..... இப்படி நமக்குள் இருக்கும் ஏதோ ஒன்றுக்கு 'மனசு' என பெயரிட்டு நாமும் அதையே முன்னிறுத்தி பேசிக்கொண்டுதான் இருக்கிறோம். என் மனதை நான் அறிந்துக்கொள்ளும் முயற்சியாகவே "என் மனதில் இருந்து"என பெயரிட்டு இந்த வலைப்பக்கத்தை தொடங்கி இதோ ஒரு வருடம் ஆகிவிட்டது.

தற்செயலாகதான் எழுத ஆரம்பித்தேன். அதுவரை என் டயரியில் மட்டுமே எழுதிவைத்து வந்த கவிதைகளில் சிலவற்றை பதிவிட ஆரம்பித்து பின் என்னை சுற்றி நிகழ்பவைகளையும் எனக்குள் நிகழ்பவைகளையும் எழுதி வருகிறேன். பெரும்பாலும் அந்தந்த நேர உணர்ச்சிகளின் வெளிப்பாடாகவே என் பதிவுகள் இருப்பதாக உணர்கிறேன். நான் காண்கின்ற உணர்கின்ற அனைத்தும் எனக்குள் ஏற்படுத்தும் ஆழமான பார்வையை எழுதிட விரும்பினேன். மனதிற்குள் சிக்கி தவிக்கும் உணர்வுகளை கவிதைகளிலாவது கொட்டி விட வேண்டுமென நினைக்கிறேன்! ஆனால் கவிதைகளில் கூட வெளிப்படுத்த முடியாத நேரங்களில் ஓவியங்களின் மூலம் எனது உணர்வுகள் வண்ணங்களாக வெளிப்படும் போது ஏதோ ஒரு வித நிறைவு ஏற்படுகிறது.ஒவ்வொரு முறையும் ஏதோ ஒன்று என்னை சலனப்படுத்தும் போது இங்கே அவை எழுத்துக்களாக வடிவம் பெறுகிறது.

இதன் மூலம் அற்புதமான நட்புகள் கிடைத்திருக்கிறது. கிடைத்திருக்கும் தோழமைதான் என்னை பரவசப்படுத்தி மீண்டும் மீண்டும் எழுத தூண்டுகிறது.

என் வலைப்பக்கத்தை பார்வையிடும் அனைத்து உள்ளங்களிலும், தொடர்ந்து பதிவுகளை படித்து எழுதும் பின்னூட்டங்களிலும் உங்களுக்கும் எனக்குமான‌ பிரியத்தை உணர்கிறேன். ஒரு வருடம் ஆகிய நிலையில் உங்கள் அனைவரையும் நன்றியுடன் நினைத்துப்பார்க்கிறேன்.

எழுத்துக்களாலே நாம் இணைந்திருக்கிறோம். இன்று அதே எழுத்துக்கள் மூலமாகவே என் பிரியமானவர்களுக்கு நன்றிகளை சமர்ப்பிகிறேன்.

ஒரு பெண்ணின் பெண் ஓவியம்!

2010-08-29T00:01:00.001+02:00

நம் தமிழ் வார பத்திரிக்கைகளில் இடம் பெறும் கவிதைகளுடன் சில நேரம் குட்டி குட்டியாக‌ பொருத்தமான படங்கள் போடுவார்களே கவனித்து இருக்கிறீர்களா? பல சமயம் மாடர்ன் ஆர்ட் போலவே இருக்கும். படிக்கும்போதே கூட இருக்கும் ஓவியங்களையும் நான் கவனித்து பார்ப்பதுண்டு. எதையும் பார்த்தவுடன் வரைந்து பார்க்கும் பழக்கம் உள்ளதால் புத்தகங்களில் வரும் படங்களை பார்த்ததும் வரைந்துவிடுவேன். அதிலும் கருப்பு வெள்ளையில் வரைவது எனக்கு மிகவும் பிடிக்கும் என்பதால் இது போல நிறைய‌ படங்களை நான் கல்லூரியில் படிக்கும் போது வரைந்திருக்கிறேன். அப்போது நான் வரைந்த படம்தான் இங்கு நீங்கள் கீழே காண்பது. வெறும் கறுப்பு பேனாவினை மட்டும் கொண்டு வரைந்தது.

இதை கலரில் வரைந்து பார்த்தால் என்ன என தோன்றியது. முதலில் இதே படத்தை கணினியில் ஏற்றி MS Photo Premium 10 உபயோகித்து கலர் கொடுத்தேன்.எப்போதும் என் விரல்களுக்கு வளைந்துக்கொடுக்கும் தூரிகைகளுக்கு பதிலாக இந்த முறை 'மவுஸ்' வளைந்துக்கொடுத்தது. அதனால் இந்த பெண்ணுக்கு விதவிதமாக சேலைகலரை மாற்றி ரசித்தேன். இதோ கணினியின் வண்ணங்கள்தான் நீங்கள் கீழே காண்பது....... ! ஆர்வம் உள்ளவர்கள் மேலே உள்ள படத்தை காப்பி பண்ணி இதே முறையில் கலர் கொடுத்து பாருங்கள்.

இதையே ஆயில் பெயிண்டில் வரைந்து பார்க்க தோன்றியது. அதனால் 50X20 அளவு கேன்வாஸ் போர்டில் முதலில் பென்சிலில் வரைந்துக்கொண்டேன். தற்பொழுது என் வீட்டு ஹால் இன்டீரியர் டெக்கரேஷன் ப்ளு & பிரவுன் நிறங்களில்தான் செய்துள்ளேன். இந்த இரண்டு கலரும் நல்ல காம்பினேஷனாக இருக்கிறது. அதனால் அதே நிறங்களில் முயற்சி செய்து பார்த்தேன். எப்படி இருக்கிறது என்று நீங்கள்தான் சொல்ல வேண்டும்.

வெட்கப்புன்னகை !

2010-08-20T09:02:00.000+02:00

Happy Birthday Glitter Graphics

அன்றுதான்
முதல் முறை
நீயும் நானும் பேசிக்கொண்டது.

உன் குர‌லை
கேட்கப்போகிறேன்
ஆவல் ஒரு புறம் !
உளறாமல் நான் பேசவேண்டுமே
பதட்டம் மறுபுறம் !

தொலைப்பேசி என் கையிலும்
படபடப்பு நெஞ்சிலும்
மனம் நிறைய மகிழ்ச்சி
அன்று உன் பிறந்தநாள் ஆனதால் !

நீயே எடுக்க வேண்டும்
எண்ணியபடி
எண்களை அழுத்துகிறேன்
எதிர்ப்பார்ப்பின் உச்சமாய்
நினைத்தபடி
நீயேதான் !

"ஹலோ" என்றாய்
"ஹாப்பி பர்த்டே" என்றேன் நான்
சட்டென "வெறும் வாழ்த்துக்கள்
மட்டும்தானா" என்றாய் நீ !

பேச எழுந்த வார்த்தைகளை
என் புன்னகையினூடே
உதடு கடித்து மறைத்துக்கொண்டேன்!
சிந்திய
வெட்கப்புன்னகையினை
சிதறாமல் பிடிக்க
என் முன்னே
இல்லை நீ !

அங்கே சிறிது மெளனம்!
நிலவிய மெளனத்தில்
அரங்கேறி இருக்க வேண்டும்
நம் காதல்
உனக்கு தெரியாமலும்
எனக்கு தெரியாமலும்!

பின் ஏதேதோ பேச நினைத்தும்
முதல் உரையாடலில்
முடியாமல் போனது.

தொலைபேசியை
வைத்துவிட்டு தேடிச் சென்றேன்
பகிர்ந்துக்கொள்ள
என் அம்மாவை நோக்கி !

வெட்கங்களின் இடையிடையே
சொற்களை கோர்த்து
நீ பேசியதை சொன்னேன்.
"அதெல்லாம் கல்யாணத்திற்கு அப்புறம்தான்னு
சொல்ல வேண்டியதுதானே" என்றாள் அம்மா.

உன்னிடம் முதலில்
தோன்றி மறைந்த
வெட்கப்புன்னகை
மீண்டும் சிந்தியது
இம்முறை
அம்மாவின் முன்னால்.

அன்று ஆரம்பித்தது
உன்னால்
இன்றுவரை
தொடர்ந்துக்கொண்டு இருக்கிறது
உன்னிடமே !

ஆனால் அன்று சிதறிய
என் வெட்கப் புன்னகையை
இன்று
சிதறாமல் சேகரிக்கின்றாய் !

என்னில் வாழும் என் இன்னொரு உயிரான என்னவருக்கு இனிய பிறந்த நாள் வாழ்த்துக்கள்.

Happy Birthday Xavier

மனம் தேடும் சந்தோஷம்!

2010-08-18T11:00:00.001+02:00

நெற்றியில் பதிந்த‌ என்னவரின் அழுத்தமான முத்தத்தினால் அழகாக விடிந்தது எனது பொழுது. பிறந்த நாள் என்றாலே எல்லோருக்கும் ஏதோ ஒரு வகையில் மனது சந்தோஷம் கொள்கிறது.

எனக்கும் அப்படிதான்! எழுந்ததில் இருந்து சொந்தங்கள், நண்பர்களின் தொலைபேசி அழைப்புகளினாலும், மெயில்கள் மற்றும் பதிவின் மூலமாகவும் வாழ்த்துக்களை பெற்ற மகிழ்ச்சியில் காலையில் கோவிலுக்கு சென்றேன். மாதாவின் பெருவிழா என்பதால் ஒன்பது பாதிரியார்களின் ஆசிர்வாதத்தில் திருப்பலி கண்டு மகிழ்ந்தேன்.

கஷ்டப்பட்டு நான் சமைத்த பிரியாணியும் சிக்கன் 65யும் மதியம் சாப்பிட்டு முடித்து, இரண்டு மணி நேரம் அப்பா அம்மாவுடன் சாட்டிங்கில் பேசிக்கொண்டே அவர்கள் முன்னால் கேக் கட் பண்ணி, ( நானே செய்த கேக் இது என்பதை குறிப்பிட்டே ஆகவேண்டும்)அவர்களுக்கும் சேர்த்து நானே சாப்பிட்டுவிட்டு, மாலை என்னவருடன் கடற்கரைக்கு பயனமானேன்.

கடற்கரை சுற்றிலும் நிரம்பி இருந்த ஜனநெருக்கடியில் நானும் ஒருத்தியாகி, தொலைந்து போகாமல் இருக்க என்னவரின் கையை இறுக்க பிடித்துக் கொண்டேன். இதமாக காற்றில் அசைந்தாடும் படகில், கொஞ்சம் கொஞ்சமாக மறைந்துக்கொண்டு இருக்கும் சூரியனின் ஒளிக்கதிர்கள் தண்னீரில் பட்டு ஜொலிக்கும் அழகை என்னவரின் தோலில் சாய்ந்து கொண்டு முப்பது நிமிட படகு பய‌ணத்தை ரசித்தேன்.

வழக்கம்போல் கடற்கரை உணவகங்களில் நீண்ட வரிசை! காத்திருக்க பிடிக்காமல் என்னவருக்கும் எனக்கும் பிடித்த சைனீஸ் ரெஸ்டாரண்ட்டில் இரவு உணவை முடித்து, கடலில் நடைபெற்ற வான வேடிக்கையினை கண்டு மகிழ்ந்தேன்.

நள்ளிரவு தாண்டியும் சோர்வடையாமல் மொய்க்கும் மக்கள் கூட்டத்தில் நான் மட்டும் கொஞ்சம் சோர்வடைந்துப் போனேன். அங்கிருந்த நீண்ட டிராஃபிக்கை சிரமப்பட்டு தாண்டி வீடு வந்துசேர 2 மணி ஆகிவிட்டது.

சிறுமியாக இருந்தபோது பிறந்த நாளில் புது டிரஸ் கிடைத்தாலே சந்தோஷம், பள்ளி வயதில் தோழிகளின் வாழ்த்து அட்டைகள் வந்தாலே சந்தோஷம், கல்லூரி பருவத்தில் தொலைப்பேசியில் வரும் வாழ்த்துக்களினால் சந்தோஷம், திருமணம் முடிந்ததால் என்னவரின் காதல் பரிசுகளில் சந்தோஷம் என்று இன்று வரை என் ஒவ்வொரு பிறந்த நாளும் ஏதாவது ஒரு வகையில் சந்தோஷத்தால் நனைந்துக்கொண்டுதான் இருக்கிறது. இந்த வருடம் பதிவுலக நண்பர்களும் இணைந்திருப்பது கூடுதல் மகிழ்ச்சி!

ஆனால் இவற்றால் மட்டும் மனது முழு சந்தோஷத்தை அடைந்து விடுகிறதா… இந்த கேள்வியால் ஏனோ உண்மையான சந்தோஷத்தை மனது தேட முயற்சிக்கிறது. ஏதாவது கஷ்டப்படும் ஏழை சிறுவர்களுக்கு உதவிட வேண்டும் என தோன்றியது. அதன் தொடக்கமாக நேற்று பாண்டிச்சேரியின் முக்கிய வீதி ஒன்றில் நடைப்பாதையில் வசிக்கும் குடும்பத்தில் உள்ள 4 வயது சிறுவனுக்கு ஆடைகள், செருப்பு, நோட்டு புத்தகங்கள், பென்சில்கள், இனிப்பு கூடவே கொஞ்சம் பணமும் கொடுத்து மகிழ்ந்தேன். நேரடியாக என்னால் அதை செய்ய முடியாமல் போனதில் சின்ன வருத்தம்தான். ஆனால் பொருட்களை பெறும் போது கிடைத்த மகிழ்ச்சியினை புன்னகையால் அச்சிறுவன் வெளிப்படுத்தியதை என் தம்பி புகைப்படமாக்கி அனுப்பி இருந்தான். பார்த்து சந்தோஷம் அடைந்தேன்.

பிறந்த நாளில் மட்டும் இல்லாமல் தினசரி நிகழ்வுகளின் மூலமாக நிறைய சந்தோஷங்களை அள்ளி கொடுக்கும் இறைவனுக்கு 'நன்றி' என்று ஒற்றை சொல்லில் முடித்துவிட முடியுமா?

இனி வரும் பிறந்த நாட்களில் ஒரு சிறுவனுக்கு உதவிடும் நிலை மாறி இன்னும் கஷ்டப்படும் சில‌ சிறுவர்களுக்கு ஏதோ என்னால் முடிந்த சிறு சிறு உதவிகளை தொடர்ந்து செய்ய நல்ல மனதை அளித்திடுமாறு இறைவனை வேண்டுகிறேன்.

இன்னொரு தாயாக.....

2010-08-14T21:16:00.001+02:00

«அம்ம்ம்மா»……… வலியில் இப்படிதான் நீ கத்தியிருக்க வேண்டும். இதோ நர்சுகள் உன்னை பிரசவ அறைக்குள் அழைத்து சென்று படுக்க வைக்கிறார்கள். சில நிமிடங்களில் மருத்துவர் உதவியுடன் உனக்கு அதிகம் கஷ்டம் கொடுக்காமல் நான் பிறந்துவிட்டேன்.

தேசம் சுதந்திர தினத்தினாலும், கிறிஸ்துவர்களோ அன்னை மரியாளின் விண்ணேற்பு திருவிழாவினாலும் சந்தோஷத்தில் இருக்க நீயோ என்னை பெற்றெடுத்த ஆனந்தத்தில் மூழ்கி கிடக்கிறாய். ஆகஸ்ட் 15ல் பிறந்த குழந்தைகள் அனைவருக்கும் அன்று மருத்துவமனை பரிசுகள் வழங்க‌, அப்பாவோ நான் பிறந்த சந்தோஷத்தில் மருத்துமனையில் உள்ளவர்களுக்கெல்லாம் இனிப்பு வழங்கி கொண்டாடி இருக்கிறார்.

யார் யாரோ என்னை வந்து பார்க்கிறார்கள். தூக்கி கொஞ்சுகிறார்கள். முத்தமிட்டு மகிழ்கிறார்கள். இது பார்ப்பதை பாரேன், எவ்வளவு அழகாய் சிரிக்கிறது பாரேன் என்று மற்றவர்கள் சொல்வதை கேட்டு பூரிப்படைந்திருக்கிறாய். அதனால்தான் இப்பொழுதும் முதல் குழந்தை தரும் நினைவுகள் போல் இனிமையானது வேறெதுவும் இல்லை என்கிறாய்.

என் ஒவ்வொரு அசைவுகளையும் ரசித்தவள் நீ. ரசித்துக் கொண்டிருப்பவளும் நீதான். உன் முதல் குழந்தையாக‌ செல்ல மகளாய் வளம் வந்தவள் நான். இன்று திருமணம் முடிந்த பிறகும் உன் செல்லமாய் நான். எனக்கு தெரியும் இனி எத்தனை குழந்தைகளை நான் பெற்றெடுத்தாலும் உனக்கு நான் குழந்தைதான்.

நான் உடுத்திய முதல் ஆடையினை இன்றும் பொக்கிஷமாக பாதுகாத்து வருகிறாய். என் ஒவ்வொரு பிறந்த நாளன்றும் மறக்காமல் அதை எடுத்து பார்த்து மகிழ்ச்சி கொள்கிறாய். பிறந்தவுடன் எனக்கு கிடைத்த முதல் பரிசாக உன் தந்தை அணிவித்த மோதிரத்தையும் பத்திரமாக வைத்திருக்கிறாய். என்னவனுடன் உன்னை சந்திக்க வரும்போதும் மறக்காமல் என் சிறுவயது பொருட்களை நினைவுப்படுத்தி என் முதல் ஆடையினையும் மோதிரத்தையும் காண்பிக்கின்றாய். ஆசையுடன் தொட்டு பார்க்கிறேன். மோதிரத்தை போட்டு பார்க்க ஆசையுடன் முயன்று சுண்டு விரலின் நுனியிலே நின்று விட எல்லோரும் என்னை பார்த்து சிரிக்கிறார்கள். நீ மட்டும் வளர்ந்த என்னை பார்த்து பிரம்மிப்பு அடைகிறாய்.

'மோதிரத்தை நான் எடுத்துக்கொள்ளவா' என்றால், 'அது உன்னுடையது, உனக்குதான் சொந்தமாகும். உனக்கு குழந்தை பிறக்கட்டும் அதன் பிஞ்சு விரலிலே இது உன் அம்மாவின் மோதிரம் என்று சொல்லி போட்டு விடுவேன்' என்கிறாய்.

அப்பாவிடம் இருந்து, உடன் பிறந்த‌வர்களிடம் இருந்து, சொந்தங்களிடம் இருந்து, நண்பர்களிடம் இருந்து எனக்கு கிடைக்கிற‌ பிறந்த நாள் பரிசுகள்தான் எத்தனை எத்தனை! வாழ்த்துக்களை சுமந்து வரும் வாழ்த்து அட்டைகளும் தொலைப்பேசி அழைப்புகளும் நிறைய ! ஆனால் இவர்களை போல பொருட்களாக நீ எதுவும் வழங்கியது இல்லை. ஃபார்மலாக ஹாப்பி பர்த்டே சொன்ன‌தில்லை. ஆனால் நீ தரும் பரிசோ ஈடு இணையில்லாதது. உயிரிலே கலந்து உணர்வுகளிலே வாழ்ந்துக்கொண்டிருப்பது.

ஆழ்ந்த உறக்கத்தில் இருப்பேன். ச‌ரியாக‌ இர‌வு 12 ம‌ணிக்கு பிறந்த நாள் பரிசாக என் கேசம் வருடி நெற்றியில் அழுத்த‌மான‌ முத்த‌ம் ஒன்று த‌ருவாயே... இது போதாதா என‌க்கு! அன்றை நாள் முழுவ‌தும் ச‌ந்தோஷ‌முட‌ன் செல்ல‌! கண்மூடி தூக்கத்தில் இருந்தாலும் உன் முத்தத்தை உணர்ந்திடுவேனே! ஆயிரம் தேவதைகளின் ஆசிரை போல, உலகம் மக்களின் வாழ்த்துக்களை பெற்றதைப்போல உன் முத்தம் என் பிறந்த நாளை நிரப்பும். இன்றோ நினைத்தவுடன் கிளம்பி வரமுடியா தூரத்தில் நான். தொலைபேசியிலும் சாட்டிங்கிலுமாய் வாழ்த்துக்களை பெற வேண்டிய நிலையை நினைத்து ஏங்குகிறேன். என் ஏக்கங்களை போக்குகின்றவனாய் இன்று உன் இடத்தில் இருந்துகொண்டு என் பிறந்த நாளை துவங்கி வைக்கிறது என்னவனின் முத்தம்.

தொடரும் தொடர்பதிவு........

2010-08-04T10:00:00.000+02:00

நீண்ட நாளுக்கு பிறகு ஒரு தொடர்பதிவு, அதுவும் பேட்டி வடிவில்! கேள்விகளை படித்தவுடன் மனதில் தோன்றியவைகளையே பதில்களாக தந்து இருக்கிறேன். இந்த தொடர்பதிவுக்கு அழைத்து தோழி சுசிக்கு எனது நன்றிகள். பதிவை பப்ளிஷ் பண்ணுகிற சமயத்தில் மீண்டும் அழைப்பு இந்த தொடர் பதிவுக்கு. இம்முறை நண்பர் சீமான்கனியிடம் இருந்து. என்னை அன்புடன் அழைத்த இருவருக்கும் எனது நன்றிகள்.

1) வலைப்பதிவில் தோன்றும் உங்கள் பெயர்?

ப்ரியா

2) அந்தப் பெயர் தான் உங்கள் உண்மையான பெயரா? இல்லை எனில் பதிவில் தோன்றும் பெயரை வைக்க காரணம் என்ன?

இல்லை. ப்ரியா என் செல்ல பெயர்….. ப்ரியமாக அழைப்பதற்காக வைக்கப்பட்டது ! எனக்கு மிகவும் பிடித்த பெயரும் இதுதான்.
அப்பா அம்மா வைத்த நிஜப்பெயர் பிரெஞ்சில்.... ஏதோ நல்ல‌ பெயர்தான். ஆனால் பள்ளி பருவத்தின் போது ஆசிரியர்கள் முதல் மாணவர்கள் வரை ஒவ்வொருவரும் ஒவ்வொரு விதமாக அழைக்கும் போது ஈஸியா pronounce பண்ணுற மாதிரி ஏன் எனக்கு பெயர் வைக்கலைன்னு வீட்டில் வந்து புலம்புவேன். தவறாக உச்சரிப்பவர்களிடம் திருத்தி சொல்வதே என் வேலையாக இருந்தது. ஆனால் கல்லூரி வந்த பிறகுதான் என் பெயரை மிகச் சரியாக உச்சரிக்க ஆரம்பித்தார்கள். வலைபதிவில் என் நிஜப் பெயர் இல்லாமைக்கு இதுதான் காரணம்.

3) நீங்கள் தமிழ் வலைப்பதிவு உலகில் காலடி எடுத்துவைத்ததைப் பற்றி.

பதிவுலகில் என்ட்ரி ஆனது என்னவோ பிரெஞ்சில்தான். ஆனால் உள்ளத்தின் உணர்வுகளை உள்ளபடியே எழுதிட எனக்கு தமிழ்தான் சிறந்தது என தோன்ற முதலில் என் வலது காலடியை தமிழ் வலைபதிவுலகில் வைத்தேன். ஒரு சில மாதங்களில் இன்னொரு காலடியையும் வைக்க சொல்லி என்னை உங்களில் ஒருத்தியாக தமிழ் வலை பதிவுலகம் ஏற்றுக்கொண்டது.

4) உங்கள் வலைப்பதிவை பிரபலமடையச் செய்ய என்ன என்னென்னவெல்லாம் செய்தீர்கள்?

எதுவும் செய்யல. என்னைக்காவது எனது வலைபதிவு பிரபலமாகும் என்ற நம்பிக்கையில் இன்னும் நன்றாக எழுத முயற்சி செய்துக்கொண்டு இருக்கிறேன்.

5) வலைப்பதிவின் மூலம் உங்கள் சொந்த விஷயத்தை பகிர்ந்து கொண்டதுண்டா? ஆம் என்றால் ஏன்?அதன் விளைவு என்ன? இல்லை என்றால் ஏன்?

அதிகமா சொந்த விஷயங்களைதான் எழுதுகிறேன். விளைவு.... பதிவுலக நண்பர்களுடன் ஒரு நெருக்கம் ஏற்படுகிறது.

6) நீங்கள் பொழுதுபோக்குக்காக பதிவுகளை எழுதுகிறீர்களா அல்லது பதிவுகளின் மூலம் சம்பாதிப்பதற்காகவா?

பள்ளி படிக்கும் போது அபராதத்திற்கு பயந்து ஆங்கிலத்தில் பேசி.... ஆங்கில வழி கல்விபயின்று பின் அதிலேயே முதுகலை பட்டமும் பெற்று..... ஆங்கில ஆசிரியையாக‌ பணி செய்துக்கொண்டும்... தினசரி வாழ்க்கைக்கு பிரெஞ்சும் பேசிக்கொண்டு இருக்கும் எனக்கு, எங்கே தமிழ் பேச எழுத வாய்ப்பே இல்லாமல் போய்விடுமோ என்ற எண்ணத்தில் ஆசையாக எழுத ஆரம்பித்தேன். பொழுதுபோக்காகவும் இருக்கிறது மனது நிறைவாகவும் இருக்கிறது. நல்ல நட்புக்களை பெற்று தந்திருப்பதில் சந்தோஷமாகவே இருக்கிறேன்.

7) நீங்கள் மொத்தம் எத்தனை வலைப்பதிவுகளுக்கு சொந்தக்காரர்? அதில் எத்தனை தமிழ் வலைப்பதிவுகள் உள்ளன?

இரண்டு...... பிரெஞ்சில் ஒன்று, தமிழில் ஒன்று!
விரைவில் என் பெயிண்டிங்ஸுக்காக ஒரு வெப்சைட் தொடங்கலாம் என நினைத்துக்கொண்டிருக்கிறேன்.

8) மற்ற பதிவர்கள் மீது எப்போதாவது உங்களுக்கு கோபம் அல்லது பொறாமை ஏற்பட்டது உண்டா? ஆம் என்றால் யார் அந்த பதிவர்? ஏன்?

இல்லை. மாறாக ஒவ்வொருவரும் ஒவ்வொரு விதமாக எழுதும் எழுத்துக்களை கண்டு வியப்படைகிறேன்.

9) உங்கள் பதிவை பற்றி முதன் முதலில் உங்களை தொடர்புகொண்டு பாராட்டிய மனிதர் யார்? அவரைப் பற்றி, அந்த பாராட்டைப் பற்றி..

முதன் முதலில்……… இந்த வார்த்தையில்தான் எத்தனை சுகம் இருக்கு. அது தரும் சந்தோஷமே தனிதான். அப்படி ஒரு சந்தோஷத்தை தந்தவர் நண்பர் ஜோ ... தனக்கென தனி ஸ்டைலில் எழுதுபவர். வித்தியாசமாக எழுதும் இவரது எழுத்துக்களுக்கு ரசிகை நான். என் கவிதைகளுக்காக முதன்முதலில் கமெண்ட் எழுதியவர். அன்று முழுக்க என்னவரிடம், என் கவிதைகளையும் பாராட்டி யாரோ முகம் தெரியா ஒருவர் உலகில் எங்கிருந்தோ பாராட்டி எழுதி இருக்கிறார் என்று சொல்லி சந்தோஷப்பட்டுக் கொண்டிருந்தேன். இன்றும் நல்ல தோழனாய் இவருடன் நட்பு தொடர்கிற‌து.

10) கடைசியாக----விருப்பம் இருந்தால் உங்களைப் பற்றி பதிவுலகத்துக்கு தெரிய வேண்டிய அனைத்தையும் பற்றி கூறுங்கள்...

ம்ம் சொல்லலாம்! ஆனா முந்தைய‌ கேள்விகளுக்கு சொன்ன பதில் போல இல்லாமல் இதுக்கு detailed தான் சொல்லனும். உங்க நேரத்தை வீணாக்க வேண்டாமேன்னு பார்க்கிறேன். சுருக்கமாக எப்படி எழுதுறது? சரி ஒரு சில வார்த்தைகளில்………..

இன்றுவரை அப்பா அம்மாவின் செல்ல குழந்தையாய், உடன் பிறந்தவர்களுக்கு பிரெண்ட்லியான அக்காவாய், என்னவருக்கு ஆசை மனைவியாய், உறவுகளுக்கு பாசமானவளாய், என் மாணவர்களுக்கு சிறந்த ஆசிரியையாய்... உங்கள் அனைவருக்கும் நல்ல தோழியாய்…கனவுகளை நிஜமாக்க முயன்று கொண்டிருப்பவளாய், எந்த சூழ்நிலையிலும் பொறுமையுடன் தன்னம்பிக்கை நிறைந்தவளாய், கொஞ்சம் சோம்பேறியாய், ப‌யங்கர சென்செட்டிவாய், வாழ்க்கையில் சின்ன சின்ன விஷ‌யங்களையும் ரசித்து ஒவ்வொரு மணிதுளியும் நேசிபவள் நான்..... இப்படியெல்லாம் சொல்லனும்னுதான் ஆசை! ஆனா நானே என்னை பற்றி எப்படி சொல்லிக்க‌றது. என்னை விட என்னைப்பற்றி என் நண்பர்களாகிய உங்களுக்கு தெரிந்திருக்கும் தானே.... நீங்களே இதற்கு பதில் சொல்லுங்களேன் !

***********

இவற்றை தொடர்ந்திட நண்பர் ரகுவையும் , தோழி ஆனந்தியையும் அன்புடன் அழைக்கிறேன்.

கொஞ்சம் வரைந்துதான் பாருங்களேன்!!!

2010-07-27T14:00:00.003+02:00

சாதாரணமாக வரைய தெரிந்திருந்தாலே போதும் உங்கள் வீட்டு வரவேற்பரை சுவரில் நீங்களே வரைந்த படத்தைக்கொண்டு அழகுப் படுத்திட முடியும். இதற்கு நன்றாக வரைய தெரிந்திருக்க வேண்டும் என்ற அவசியமில்லை.. பொதுவாக எல்லோருக்கும் ஒரு சிறு பூவாவது வரைய தெரிந்து இருக்கும் இல்லையா! அதனால் அதற்கு எப்படி வண்ணங்கள் தீட்டுவது என்று பார்ப்போம்.

அதிக வண்ணங்கள் கூட அவசியமில்லை. தேவையானவை 5 அல்லது 6 நிறங்கள் அது வாட்டர் கலரா அல்லது ஆயில் கலரா என்பது உங்க விருப்பம். (இங்கே நான் பயன்படுத்தி இருப்பது ஆயில் பெயிண்ட்) 50 x 70cm அள‌வில் ஒரு பெரிய தாள் அல்லது கேன்வஸ் போர்ட், இரண்டு பிரஷ், பென்சில் கூடவே கொஞ்சம் பொறுமை நிறைய ஆர்வம்... !

செம்பருத்தியோ ரோஜாவோ அல்லது தாமரையோ முதலில் உங்களுக்கு பிடித்த ஏதாவது ஒரு பூவை ஒன்றின் பக்கம் ஒன்றாக பெரியதும் சிறியதுமாக‌ நான்கைந்து பூக்களை பென்சிலால் வரைந்துக்கொள்ளுங்கள். இலைகள் கூட அவசியமில்லை. இங்கே நான் வரைந்திருப்பது ஐரோப்பிய நாடுகளில் பரவலாக பூக்கும் ‘கொக்லிக்கோ’(Coquelicot(Fre.) - Poppy(Eng.)) மலர்கள்.

எப்போதும் வண்ணங்களை தேர்ந்தெடுப்பதில்தான் அதிக கவனம் தேவை. முதலில் டார்க் கலரை கொண்டு பூக்களற்ற மற்ற பகுதியில் பெயிண்ட் பண்ணுங்க. அது உங்க வீட்டு வரவேற்பரையில் உள்ள கர்ட்டன் கலரிலோ... டேபிள் க்ளாத் கலரிலோ இருந்தால் கூடுதல் அழகை கொடுக்கும்.

வெறும் ஒரே நிறத்தைக்கொண்டு தீட்டாமல் ஓரங்களில் கொஞ்சம் கருப்பு நிறத்தையும் உட்புறமாக கொஞ்சம் வெள்ளையும் கலந்தால் பார்ப்பதற்கு நன்றாக இருக்கும்.

அடுத்து பூக்களுக்கான நிறத்தை தேர்வு செய்துக்கொள்ளுங்கள். சிகப்பு, ஆரஞ்சு, பிங்க், நீலம்..... இப்படி எந்த நிறமாக இருந்தாலும் நீங்கள் தேர்ந்தெடுக்கும் நிறம் ஏற்கனவே தாளில் கொடுக்கப் பட்டிருக்கும் நிறத்துக்கு கான்ட்ராஸ்ட் ஆக‌ இருந்தால் பார்க்க பளிச்சென்று இருக்கும். பூவிதழ்களின் ஓரங்களில் கொஞ்சம் அழுத்தமாக, டார்காகவோ அல்லது லைட்டாகவோ வண்ணம் தீட்டினால் ஒவ்வொரு இதழ்களும் தனித்தனியாக தெரியும். பூத்தண்டுகளுக்கு பச்சையும் இடையிடையே கொஞ்சம் கருப்பு நிறமும் கலந்து அடித்து விடுங்கள்.

பொருத்தமாக ஃபிரேம் செய்து விட்டால், அவ்வளவுதான்.... ஒரு சிம்பிளான பெயிண்டிங் ரெடி! காசுக் கொடுத்து வாங்கும் பொருளை விட நாமே தீட்டிய ஓவியத்தைக்கொண்டு வீட்டை அழகுப்படுத்துவது சந்தோஷம்தானே! உங்களுக்குள் இருக்கும் வரையும் திறனை வெளிக்கொண்டு வரும் சிறு முயற்சியாக இது இருக்கட்டுமே.. கொஞ்சம் வரைந்துதான் பாருங்களேன்!

தொடர்ந்திடும் உற்சாகம் !!!

2010-07-23T15:15:00.000+02:00

உடலில் சோர்வு என்றால் நன்றாக தூங்கியோ உடற்பயிற்சியாலோ சரி செய்து விடலாம். ஆனால் மனது சோர்வுரும் நேரங்களில் என்ன செய்வது. அப்படிப்பட்ட சமயங்களில் ஏதாவது புதிதாக கற்றுக்கொண்டால் நல்லது என்று நினைக்கிறேன். ஏனெனில் புதியதாக ஒரு விஷயத்தை தெரிந்துக்கொள்வதிலும் கற்றுக்கொள்வதிலும் ஆர்வம் ஏற்பட்டு நிச்சயம் மனதில் உற்சாகம் பெருகிடும். அப்படிதான் கடந்த இரண்டு மாதமாக நான் யோகா கற்றுக்கொண்டு வருவதும்.

நம் நாட்டில் இருந்தவரை அதைப்பற்றி ஏதும் தெரியாது, தெரிந்துக்கொள்ள வேண்டிய சூழ்நிலையும் இல்லை. இன்று ஏதோ ஒன்று என்னை யோகா கற்றுக்கொள்ள தூண்டியது. நம் இந்திய நாட்டிற்கு பலமுறை வந்து முறைப்படி யோகா படித்து பட்டம் பெற்ற ஒரு பிரெஞ்சு பெண்தான் இந்த வகுப்புகளை நடத்துகிறார்.

உடலை ஆரோக்கியமாகவும் அழகாகவும் வைத்துக்கொள்வது எனக்கு பிடிக்கும். அதனால் என் கல்லூரி நாட்களில் இருந்தே உடற்பயிற்சி செய்ய ஆரம்பித்தேன். ரொம்ப கஷ்டப்பட்டு எல்லாம் செய்ய‌ மாட்டேன். சும்மா வீட்டிலேயே கையை காலை அசைத்து குனிந்து நிமிர்ந்து ஏதாவது செய்துக்கொண்டு இருப்பேன். உடற்பயிற்சி வெறும் உடலை மட்டுமா நன்றாக வைத்துக்கொள்ளும், மனதையும் சேர்த்துதானே! அது பற்றாத வேளையிலதான் இந்த யோகா பயிற்சி மனதை ஆரோக்கியமாக வைத்துக்கொள்ள உதவுகிறது. மனதில் தேவையில்லாமல் இருக்கும் கோபம், எரிச்சல், etc.,எதுவாகினும் அதை நீக்கிட யோகா உதவும் என்று நினைக்கிறேன். பொதுவாக நான் எளிதில் உணர்ச்சி வசப்பட மாட்டேன், முக்கியமாக கோபப்படும் விஷயத்தில். அவசியமற்ற கோபம் நம் மனதை அசிங்கமாக்கிவிடும் வாய்ப்புள்ளது. எனவே, நான் என் மனதை எப்போதும் அழகாக வைத்துக்கொள்வே விரும்புகிறேன், சில நேரங்களில் தானாகவே வந்து சேர்ந்திடும் சோர்வுகளை எதிர்த்து!

மனதிற்கு உற்சாகமும் சந்தோஷமும் கொடுக்கக்கூடிய இன்னொரு விஷயம் பரிசுகளும் பாராட்டுக்களும். தொடர்ந்து என்னை உற்சாகப்படுத்தி வரும் பதிவுலக நண்பர்களின் பின்னூட்டங்களும், ஊக்கப்படுத்திவரும் விருதுகளும் இன்னும் என் சந்தோஷத்தை அதிகப்படுத்தி மனதிற்கு உற்சாகத்தை கொடுக்கிறது. மீண்டும் ஒரு தங்கமகன்/மகள் விருது தந்த ஜெய்லானிக்கும், அனபாக ஒரு விருது அளித்த ஆனந்திக்கும் எனது நன்றிகள்.

சுதந்திர தினம் - 3 வான வேடிக்கை படங்கள்!!!

2010-07-20T15:30:00.001+02:00

இதோ... நீங்கள் ஆவலுடன் எதிர்ப்பார்த்த (அப்படி யாராவது இருக்கிங்களா?) வான வேடிக்கை படங்கள். பிரான்ஸின் சுதந்திர தின விழாவிற்காக அன்று இரவு கடலில் நடத்திய வான வேடிக்கையை காண இரு கண்கள் போதவில்லை. அவ்வளவு அழகு! நான் முன்பே சொல்லி இருந்த மாதிரி வானில் விடப்பட்ட முதல் வான வேடிக்கையிலேயே, அழகில் மயங்கி புகைப்படம் எடுக்க மறந்து போனேன். மேலும் கேமராவின் கண்கள் வழியே பார்ப்பதைவிட என் இரண்டு கண்களால் ரசிப்பதையே விரும்பினேன். அதனால் கீழே காணும் அத்தனை படங்களும் என்னவர் எடுத்தது.

பல வண்ணங்களில் அழகாய் தெரிந்த வான வேடிக்கைகளில் இம்முறை புதியதாக நிறைய வடிவங்களை புகுத்தியிருந்தனர். முதல் முறையாக இதயம் வடிவில்......பதிமூன்றாவது படத்தில் பாருங்கள். எனக்கு மிகவும் பிடித்தது கடைசி படம்தான். நன்றாக பார்த்தால் தெரியும் அது பனைமரம் வடிவில் இருப்பது. இங்கு கடற்கரை சாலைகளில் முழுவதும் அழகாக தோற்றமளிப்பது இந்த‌ பனை மரங்கள்தானே!!!

முதல்முறையாக வீடியோ இணைத்திருக்கிறேன். வெறும் ஒரு சில நொடிகள்தான். ஃபுல் ஸ்க்ரீனில் பார்க்கலாம். பாருங்கள், நான் ரசித்ததை நீங்களும் உணர்வீர்கள்.

சுதந்திர தினம் - 2 நள்ளிரவு கொண்டாட்டங்கள்‍!

2010-07-17T14:15:00.001+02:00

சுதந்திர தினத்தன்று (ஜூலை 14) கடற்கரை சாலையில் எடுக்கப்பட்ட நள்ளிரவு கடைகளின் படங்கள் இது. உறங்கும் நேரத்தில் உல்லாசமாய் கரைந்த‌ இரவு!

சிறுவர்கள் பெரியவர்கள் என்று எல்லோரையும் கவர்ந்த கடை இதுவாகத்தான் இருக்கும். கிடைக்காத மிட்டாய்களே இல்லை, அத்தனை வகைகள்!!!

வண்ணங்களை கொண்டு பலவகையாக வரைந்திருக்கும் கலைஞர்களின் கடைகள்தான் நீங்கள் கீழே காணும் படங்கள்.

கண்ணாடியில்.......

மரத்துண்டுகளில்......

துணிகளில்.....

ஆப்பிரிக்கன் ஹேர் ஸ்டைலில் ஜடை பின்ன‌ப்படுகிறது...

ஆண் பெண் இருபாலரையும் கவர்ந்த Tattoos!

இதுதான் எனக்க பிடித்த ரெஸ்டாரண்ட்!

பாருங்க, எவ்வள‌வு கூட்டம். ரெஸ்டாரண்ட் வாசலையும் தாண்டி வெளியே சாலைவரை வரிசையில்.....

சாலையோரம் அமர்ந்து வரைந்துக் கொண்டிருக்கும் ஆர்டிஸ்ட்!

வீதிக்கு வீதி நடைப்பெற்ற இசை கச்சேரிகள்!

மைகேல் ஜேக்ஸனின் பாடல்களை அவரை போலவே உடுத்திக்கொண்டு ஆடி பாடிக்கொண்டிருந்தனர். கூட்டம் அதிகமாக இருந்ததால் நெருங்கி சென்று படம் எடுக்க முடியவில்லை.

எனக்கு ரொம்ப ரொம்ப பிடிச்ச ஐஸ்க்ரீம் பார்லர் இது. கடற்கரை சாலை முழுவதும் நிறைய கடைகள் இருந்தாலும் எப்போதும் இந்த கடையில்தான் கூட்டம் அதிகமாக இருக்கும். நிறைய வகைகளில் வேறு எங்கேயும் கிடைக்காத ஐஸ்க்ரீம்ஸ் இங்கதான் கிடைக்கும்.

வான வேடிக்கைகையை காண காத்திருக்கும் கூட்டம்!

கடற்கரை பாறைகளில் முன்பே சென்று இட‌ம்பிடித்து காத்திருக்கும் மக்கள்.... வான வேடிக்கையை மிக அருகினில் காண்பதற்கு!

சுதந்திர தினக் கொண்டாட்டத்தின் தொடர்ச்சியாக அன்று நடத்தப்பட்ட‌ வான வேடிக்கையின் படங்கள் அடுத்த பதிவில் தொடரும்.